ავარია ახალციხეში – დაიმტვრა ‘გაერთიანებული წყალმომარაგების კომპანიის’ ავტომანქანა

ავტოსაგზაო შემთხვევა ახალციხეში დღეს, 17 მარტს, საღამოს, დაახლოებით 20:20 საათზე, კოსტავას ქუჩაზე მოხდა. „საქართველოს გაერთიანებული წყალმომარაგების კომპანიის“ პიკაპი ჯერ ქუჩის მარჯვენა მხარეს დაპარკინგებულ ორ მსუბუქ ავტომანქანას დაეჯახა, შემდეგ კი ფეხით მოსიარულეთა ნაწილს. შემთხვევის შედეგად არავინ დაშავებულა, თუმცა, სამედიცინო დაწესებულებაში გადაყვანა დასჭირდა პიკაპის მძღოლს, კომპანიის თანამშრომელს.

თვითმხილველების თქმით, სავარაუდოდ მძღოლი მოძრაობის დროს ცუდად გახდა, საჭე ვერ დაიმორჩილა და ავარიაც ამიტომ შეემთხვა.
„ უცნაურად მოჰყავდა მანქანა, ჯერ ერთ მანქანას დაეჯახა, შემდეგ მეორეს და ბოლოს გაჩერდა“, – ამბობს ერთ–ერთი თვითმხილველი.
შემთხვევის ადგილზე გამოძახებულმა სასწრაფო დამარების ჯგუფმა მძღოლი კლინიკა „იმედში“ გადაიყვანა.

სასწარაფო–სამედიცინო დახმარების სამსახურის საზოგადოებასთან ურთიერთობის სამსახურის წარმომადგენელის თქმით, კლინიკა „იმედში“ 65 წლის მამაკაცი გულ–მკერდის არეში ტკივილითაა გადაყვანილი.

ნამდვილად ეკუთვნის თუ არა ავტომობილი „საქართველოს გაერთიანებული წყალმომარაგების კომპანიას“, ეს ახალციხის სერვის–ცენტრია თუ სამცხე–ჯავახეთის, რა პოზიციაზე მუშაობს ავტომობილის მძღოლი და სამსახურეობრივ მოვალეობას ასრულებდა თუ არა, ამ კითხვებზე პასუხის მისაღებად „სამხრეთის კარიბჭე“ კომპანიის საზოგადოებასთან ურთიერთობის სამსახურს დაუკავშირდა.

„ცხრა საათზე უნდა დამირეკოთ?ეგრე ათასი ავარია ხდება“, – გვითხრა ნინო რამიშვილმა და ტელეფონი გაგვითიშა.

საქართველოს შინაგან საქმეთა სამინისტროს პრესსამსახურის საზოგადოებასთან ურთიერთობის სამსახურის ინფორმაციით, მომხდარზე ძიება საქართველოს სისხლის სამართლის კოდექსის 276–ე მუხლის 1–ლი ნაწილით დაიწყო. აღნიშნული მუხლი გულისხმობს "ავტომობილის, ტრამვაის, ტროლეიბუსის, ტრაქტორის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება, – ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ".











[ვარლამ წიკლაური, ახალციხე]