კანონთან კონფლიქტში მყოფი პირებისთვის საგრანტო კონკურსი გამოცხადდა

ბიზნეს იდეების საგრანტო კონკურსით დაინტერესებული პირებისათვის, ახალციხეში, ზრდასრულთა განათლების ცენტრში 16 მაისს, 16:00 საათზე საინფორმაციო შეხვედრა გაიმართება. მისი ორგანიზატორი არასამთავრობო ორგანიზაცია "სიდაა".

კონკურსის ფარგლებში, სამიზნე ჯგუფებს: ყოფილ პატიმრებს, პირობითი მსჯავრის მქონე, განრიდებულ პირებსა და მათი ოჯახის წევრებს, საშუალება ექნებათ წარადგინონ მათთვის საინტერესო ბიზნეს პროექტი და გამარჯვების შემთხვევაში დაფინანსება 1000 ევროს (ექვივალენტი ლარში) ოდენობით მიიღონ.

გრანტები ევროკავშირის ფინანსური დახმარებით გაიცემა, როგორც სოფლის მეურნეობის, ისე არასასოფლო–სამეურნეო სფეროების გაძლიერებისათვის. გრანტის გაცემის პირობებიდან გამომდინარე, გამარჯვებულ კონკურსანტებს გადაეცემათ ბიზნესის დაწყება–განვითარებისათვის საჭირო ინვენტარი და/ან საშუალებები.

კონკურსის პირველ ეტაპზე, შერჩეული ბიზნეს იდეების ავტორები გაივლიან ბიზნეს-პროექტების წერის ტრენინგს, რომლის შემდეგაც, ექნებათ ბიზნეს გეგმების წარმოდგენის საშუალება.

წარმოდგენილი ბიზნეს გეგმებიდან, სპეციალური კომისია, წინასარ განსაზღვრული კრიტერიუმებით, საუკეთესოებს შეარჩევს.
ორგანიზატორების განმარტებით, საბოლოოდ, 70-მდე ბიზნეს პროექტი დაფინანსდება.

ახალციხეში, შეხვედრაზე დასწრება ყველა დაინტერესებულ პირს შეუძლია.

საკონტაქტო ინფორმაცია: 592 92 64 64

[თაკო ფეიქრიშვილი, ახალციხე]