საგრანტო კონკურსი საქართველოსა და სომხეთის საზღვრისპირა რეგიონებისთვის

აღმოსავლეთ პარტნიორობის ტერიტორიული თანამშრომლობის პროგრამა, რომელსაც ევროკავშირი აფინანსებს, საქართველოსა და სომხეთის ხუთ რეგიონში ხორციელდება: სამცხე–ჯავახეთში, ქვემო ქართლში, შირაქში, ლორში და ტავუში.

„ეს გახლავთ საქართველო–სომხეთის საზღვრისპირა რეგიონების სოციალური ეკონომიკური განვითრების მხარდაჭერის პროექტი. თითო პროექტის ბიუჯეტი უნდა იყოს 20 000 ვეროდან 250.000 ევრომდე. საერთო ჯამში გათვალისწინებულია 1. 350. 000 ევრო“, – განაცხადა აღმოსავლეთ პარტნიორობის ტერიტორიული თანამშრომლობის პროგრამის შესაძლებლობათა გაძლიერების ექსპერტმა ლორენცო ნავამ, რომელიც დღეს, 10 ნოემბერს ახალციხის დემოკრატიული ჩართულობის ცენტრში არასამთავრობო ორგანიზაციის წარმომადგენლებს შეხვდა და საგრანტო კონკურსის შესახებ ესაუბრა.

საგრანტო კონკურსში გამარჯვებული რამდენიმე კრიტერიუმის მიხედვით შეირჩევა. ესენია: რეგიონში სოციალურ–ეკონომიკური მდგომარეობის გაუმჯობესების ხელშეწყობა, ასევე ბიზნესის, ახალგაზრდული საქმიანობის, ტურიზმისა და კულტურული სფეროების ხელშეწყობა. განაცხადის შეტანის ბოლო ვადა 3 თებერვალია. გამარჯვებული 2015 წლის მაისში გამოვლინდება.

„ძალიან მნიშვნელოვანი პროექტია. მსგავი სახის პროგრამების განხორციელება ხელს შეუწყობს ორ ქვეყანას შორის ურთიერთობის გაღრმავებას, ასევე არასამთავრობო სექტორის და სამოქალაქო საზოგადოების განვითარებას“, – ამბობს არასამთავრობო ორგანიზაცია „ახალციხის ახალგაზრდული ცენტრის“ დირექტორი მაკა სუდაძე.

მისივე თმით „ახალციხის ახალგაზრდული ცენტრი“ კონკურსში მონაწილეობის მიღებას აპირებს და სომხეთში პარტნიორი ორგანიზაცია უკვე შერჩეული ჰყავთ.
აღმოსავლეთ პარტნიორობის ტერიტორიული თანამშრომლობის პროგრამაში საქართველო 2012 წლიდან არის ჩართული.

„აქამდე ეს პროგრამა მუშაობდა იმ მიმართულებით, რომ ქართველი და სომეხი არასამთავრობო სექტორის წარმომადგენლები დააკავშირა ერთმანეთს. ჩატარდა სხვადასხვა სახის ტრენინგები. როგორ უნდა დაიწეროს პროექტები, როგორ შეივსოს საგრანტო განაცხადები, ნაბიჯ–ნაბიჯ მოგვამზადეს ორგანიზაციები დღევანდელი დღისთვის“, – ამბობს მაკა სუდაძე.




[თინათინ ზაზაძე ახალციხე]