ხუთთვიანი ლოდინის შემდეგ ახალციხის პირველი სკოლის რეაბილიტაცია იწყება

ახალციხის პირველი საჯარო სკოლის დირექტორის ჟუჟუნა გოგოლაურის განმარტებით, შენობა ავეჯისგან უკვე დაცლილია: "სარემონტო სამუშაოები ექვს თვეს გაგრძელდება. მომავალი წლის სექტემბერში ახალ სასწავლო წელს რეაბილიტირებულ სკოლაში შევხვდებით".

შენობის რეაბილიტაციას აშშ-ის ათასწლეულის გამოწვევის კორპორაცია (“Millennium Challenge Corporation- MCC”) აფინანსებს. ტენდერში გამარჯვებულ კომპანიასთან ხელშეკრულებას 19 ნოემბერს მოეწერა ხელი.

პირველის სკოლის 950 მოსწავლე დროებით ქალაქის სხვა სკოლებში ისწავლის. მათთვის გაკვეთილები 14:00 საათიდან 19:00 საათამდე ჩატარდება.

„ბავშვები მეექვსე და მესამე სკოლაში გადავანაწილეთ. ორშაბათიდან პირველ სკოლაში აღარ მოვლენ. დაწყებითი კლასები მეექვსე სკოლაში ისწავლიან, დანარჩენები კი მესამე სკოლაში“, – ამბობს ჟუჟნა გოგოლაური.

რამდენი დაიხარჯება პირველი საჯარო სკოლის რეაბილიტაციისთვის უცნობია. ერთთვიანი მცდელობის მიუხედავად „სამხრეთის კარიბჭემ“ ათასწლეულის გამოწვევის ფონდის - საქართველოს მთავრობასთან, ბიზნესთან და საზოგადოებასთან ურთიერთობის დირექტორისგან გიორგი კოპალეიშვილისგან პასუხი ვერ მიიღო.

შეგახსენებთ, რომ პირველი სკოლის რეაბილიტაციისთვის ტენდერი მეორედ გამოცხადდა.

სკოლის ადმინისტრაციამ შენობის დაცლა 5 აგვისტოს დაიწყო და დაცალა კიდეც, თუმცა ტენდერის ჩაშლის გამო, ინვენტარის უკან შეტანა მოუხდა.





[თინათინ ზაზაძე, ახალციხე]