ახალციხის პირველი სკოლა ხვალ საზეიმოდ გაიხსნება

სკოლაში საზეიმო ღონისძიება 12:00 საათზე დაიწყება. ამ ეტაპზე სკოლის ადმინისტრაცია მოსაწვევებს არიგებს. საზეიმო გახსნაზე სხვადასხვა დელეგაციებს ელიან.

შეგახსენებთ, რომ ახალციხის პირველ საჯარო სკოლაში სარემონტო სამუშაოები 2016 წლის იანვარში დაიწყო. მშენებლობა იმავე წლის აგვისტოში უნდა დასრულებულიყო. მშენებლობის დასრულებამდე პირველი სკოლის 1000–მდე მოსწავლე ახალციხის მესამე და მეექვსე სკოლებში გადაანაწილეს, სწავლა მეორე ცვლაში მიმდინარეობდა.

ახალციხის პირველი საჯარო სკოლის შენობის რეაბილიტაცია აშშ-ის ათასწლეულის გამოწვევის კორპორაციამ (“Millennium Challenge Corporation- MCC”) დააფინანსა. ტენდერში გამარჯვებულ კომპანიასთან ხელშეკრულებას 2015 წლის 19 ნოემბერს მოეწერა ხელი. კომპანია „ინტერ პლუსმა“ მშენებლობის ვადები რამდენჯერმე დაარღვია და ამიტომ, დამკვეთმა მას ხელშეკრულება შეუწყვიტა და ჯარიმა დააკისრა. ამის გამო, მცირე პერიოდით, იქამდე, ვიდრე ახალი ტენდერი გამოცხადდა და გამარჯვებული გამოვლინდა, პირველი სკოლის რემონტი შეწყდა. საბოლოოს სკოლის რეაბილიტაცია ახალმა კომპანიამ „ჯორჯიან ინჯინიერმა“ დაასრულა.

[თინათინ ზაზაძე, ახალციხე]