ახალციხის პირველ სკოლაში დემონტაჟი დასრულდა

ახალციხის პირველ საჯარო სკოლაში პირველ სართულზე ბოლო კედლის დემონტაჟი მიმდინარეობს. ბოლო, მესამე სართულზე კი ლესვა და ელექტროობის გაყვანა უკვე დასრულებულია.

შენობაში დემონტაჟისთვის მშენებელ კომპანიას ერთი თვე დასჭირდა.

„თებერვლის ბოლოსთვის შესრულებული იქნება ლესვა, იატაკის მოჭიმვა, ელექტროგაყვანილობა, დავიწყებთ სველი წერტილების მოწყობას“, – ამბობს მშენებელი კომპანიის „ინტერ პლიუსის“ფინანსური დირექტორი ლექსო მათეშვილი.

ტენდერში გამარჯვებულმა კომპანიამ 400 070 ლარით 4 500 კვადრატული მეტრი უნდა გაარემონტოს. გარდა ამისა, მათ მოუხდებათ სახურავის შეცვლა და გათბობის სისტემის დამონტაჟებაც, თუმცა ეს ამ თანხაში გათვალისწინებული არაა.

„ეს პროექტში არ იდო, ამიტომ ამისთვის პროექტი ახლა მზადდება. რა თანხა დაჯდება, ჯერ სრულად დათვლილი არ არის“, – აცხადებს მათეშვილი.

„ინტერ პლიუსს“ პირველი სკოლის რემონტისთივს დასაქმებული 38 კაცი ჰყავს. ამბობენ, რომ ყველა ადგილობრივია.

„სამუშაოები აგვისტოში უნდა დავასრულოთ, დროში ჩავეტევით“, – აცხადებენ მშენებლები.

„ინტერ პლიუსმა“ პირველ სკოლაში სარემონტო სამუშაოები 12 ინავარს დაიწყო.

შეგახსენებთ, შენობის რეაბილიტაციას აშშ-ის ათასწლეულის გამოწვევის კორპორაცია (“Millennium Challenge Corporation- MCC”) აფინანსებს. ტენდერში გამარჯვებულ კომპანიასთან ხელშეკრულებას 19 ნოემბერს მოეწერა ხელი.

პირველის სკოლის 950 მოსწავლე დროებით ქალაქის სხვა სკოლებში სწავლობს.

[თამუნა უჩიძე, ახალციხე]