ახალციხის პირველ სკოლაში რემონტის დასრულებას სწავლის დაწყებამდე გეგმავენ

როგორც "ათასწლეულის გამოწვევის ფონდის" საზოგადოებასთან ურთიერთობის სამსახურში განგვიმარტეს, ტენდერი იმ კამპანიებს შორის გამოაცხადეს, რომლებთანაც მუშაობის გამოცდილება ჰქონდათ: „აგვისტოს პირველ კვირაში გვეცოდინება, რომელი კომპანია შეირჩა.

დაჩქარებული მეთოდით ვაკეთებთ. ჩვენი მთავარი მიზანია სექტემბერში სკოლაში სასწავლო პროცესი განახლდეს“, – აცხადებენ "ათასწლეულის გამოწვევის ფონდის" საზოგადოებასთან ურთიერთობის სამსახურში.

რაც შეეხება სკოლის ეზოს კეთილმოწყობას, "ათასწლეულის გამოწვევის ფონდის" ინფორმაციით, ამას საგანმანათლებლო და სამეცნიერო ინფრასტრუქტურის განვითარების სააგენტო უზრუნველყოფს. თუმცა ეს მოგვიანებით, რადგან, ვიდრე სკოლის შენობის რეაბილიტაცია არ დასრულდება, ეზოს კეთილმოწყობა ვერ დაიწყება.

შეგახსენებთ, რომ პირველი სკოლის რემონტი 2016 წლის დასაწყისში დაიწყო და აგვისტოში უნდა დასრულებულიყო, თუმცა დღემდე არ დასრულებულა. ვადების გადაცილების და საქმის არაჯეროვანი შესრულების გამო "ათასწლეულის გამოწვევის ფონდმა" კომპანია „ინტერპლიუსს“ კონტრაქტი 7 ივლისს შეუწყვიტა.

[თინათინ ზაზაძე, ახალციხე]