ახალციხის პირველი სკოლის პროექტში ცვლილებების შეტანა უხდებათ

ახალციხის შოთა რუსთაველის სახელობის პირველ საჯარო სკოლაში ამ დროისთვის საკლასო ოთახებისა და კაბინეტების ნგრევა მიმდინარეობს. როგორც სკოლის დირექტორი ჟუჟუნა გოგოლაური აცხადებს, შენობის მხოლოდ კარკასი უნდა დატოვონ.

გოგოლაურის განმარტებით, მას შემდეგ რაც სკოლის ნგრევა დაიწყო, აქ უფრო მეტი სამუშაო აღმოჩნდა, ვიდრე ელოდნენ.

„2007–2008 წლებში სახურავი უხარისხო მასალით და ასევე უხარისხოდ იყო გადახურული, სახურავს შესაბამისი საყრდენები არ ჰქონდა.

სიცარიელე აღმოჩნდა ამავე დროს ჩასმულ ფანჯრებსა და კედლებს შორის. გარდა ამისა, ავარიული ვითარება დახვდათ მშენებლებს ძველ და ახალ კორპუსებს შორის. ამიტომ ცვლილებები შეაქვთ და შესაბამისად პროექტის ხარჯიც იცვლება“, – გვიხსნის გოგოლაური და ამატებს, რომ ამ ყველაფერს შედარებით მეტი დრო დასჭირდება, სამაგიეროდ ყველაფერი უსაფრთხოდ და ხარისხიანად გაკეთდება.



მისივე თქმით, დრო დასჭირდა სკოლის ეზოს გარშემო მაცხოვრებლებთან მოლაპარაკებებსაც, რადგან მათი ნაწილის ეზოები და სათავსოები, სკოლასთან ძალიან ახლოს მდებარეობს: „1,50 მ. სკოლა გარშემო უსაფრთხოების მიზნით უნდა შემოღობონ. სპეციალური კომისია ამ ადამიანებთან მოლაპარაკებებს აწარმოებდა. გარდა ამისა, ერთ–ერთი მათგანის სახლის კედელი სკოლის დარბაზზეა მოდგმული, მშენებლები აცხადებენ, რომ თუ ხარაჩოების სახლზე გადატარების უფლებას მისცემენ, პრობლემა უმტკივენულოდ გადაიჭრება“.

უკვე დასრულებ სკოლაში პირველ სართულზე ცხრა, მეორეზე – 11 და მესამე სართულზე 16 საკლასო ოთახი განთავსდება. ასევე იქნება კაბინეტებიც.

„განათლების სამინისტრომ უკვე დაიანგარიშა დამდენი დაფა და კარადა გვჭირდება, ინვენტარითაც აღგვჭურვავენ. გარდა ამისა, სკოლის დარბაზისა და ეზოს კეთილმოწყობა არ იყონ გათვალისწინებული და პროექტს ესეც დაემატება“, – აცხადებს გოგოლაური.

მისი თქმით, მიუხედავად ყველაფრისა, რეაბილიტირებული სკოლა მას დაპირებისამებრ ივნისში ჩაბარდება, სექტემბერში ახალი სასწვლო წლის დაწყებას კი გარემონტებულ სკოლაში აიზეიმებენ.
შეგახსენებთ, რომ პირველი სკოლის რეაბილიტაციისთვის ტენდერი მეორედ გამოცხადდა.

სკოლის ადმინისტრაციამ შენობის დაცლა 5 აგვისტოს დაიწყო და დაცალა კიდეც, თუმცა ტენდერის ჩაშლის გამო, ინვენტარის უკან შეტანა მოუხდა.

შენობის რეაბილიტაციას აშშ-ის ათასწლეულის გამოწვევის კორპორაცია (“Millennium Challenge Corporation- MCC”) აფინანსებს. ტენდერში გამარჯვებულ კომპანიასთან ხელშეკრულებას 19 ნოემბერს მოეწერა ხელი.

პირველის სკოლის 950 მოსწავლე დროებით ქალაქის სხვა სკოლებში სწავლობს.



[თამუნა უჩიძე, ახალციხე]