მოლაპარაკება დასრულდა – ვალეში გაფიცულ მუშებს მოთხოვნებს არ უკმაყოფილებენ

კერძოდ: გაფიცულების პირველი მოთხოვნაა სამუშაო საათები ისევ გაიზარდოს, რის შედეგადაც ანაზღაურებაც გაიზრდება. როგორც მუშები "სამხრეთის კარიბჭესთან" განმარტავენ, ადრე მათი სამუშაო დღე იწყებოდა 07:30 საათზე და საღამოს 19:00 საათამდე გრძელდებოდა, ბოლო რამდენიმე დღეა, სამუშაო დღე 08:00 საათზე იწყება და 18:00 საათზე მთავრდება.

სამუშაო დღის ხანგრძლივობის 1.5 საათით შემცირებას ანაზღაურების შემცირება მოჰყვა. მუშებს ხელფასი დაახლოებით 150–200 ლარით შეუმცირდათ. ისინი ამბობენ, რომ ადმინისტრაცია სამუშაო საათების შემცირებას ზამთარს უკავშირებს და არ თანხმდება მოთხოვნას, ძველ განრიგზე დაბრუნდნენ.

რაც შეეხება მეორე მოთხოვნას, მუშები ამბობენ, რომ მუშაობენ შაბათ დღესაც და კვირასაც. შაბათს ანაზღაურებას იმ გაანგარიშებით იღებენ, როგორც სხვა სამუშაო დღეებში, კვირას კი ორმაგს. მათი მოთხოვნაა, შაბათსაც, როგორს დასვენების დღეს, ორმაგი ანაზღაურება მიიღონ. კომპანიის ადგილობრივ ხელმძღვანელობაში უთხრეს, რომ არც ამ მოთხოვნას დაუკმაყოფილებენ.

მუშების მესამე მოთხოვნა, საკვებს უკავშირდება. ისინი ამბობენ, რომ შუადღის ლანჩზე მხოლოდ ჩაი აქვთ და მენიუს გაუმჯობესებას ითხოვენ. თუმცა, აქვე ამატებენ, რომ ეს მოთხოვნა არსებითად მნიშვნელოვანი არ არის და ძველ მენიუზეც თანახმა არიან.

მოლაპარაკება, რომელზეც 4 ადამიანი იყო შესული, დაახლოებით საათნახევარს გაგრძელდა.

რადგან "ბეხეტ–ენკას" ხელმძღვანელობა მოთხოვნებს არ დათაბნხმდა, მუშებმა გადაწყვიტეს საპროტესტო აქციები გააგრძელონ.

"ჩვენ გავაგრძელებთ მშვიდობიან პროტესტს იქამდე, ვიდრე ჩვენს მოთხოვნებს არ დააკმაყოფილებენ", – აცხადებენ გაფიცულები.

მათივე თქმით, ხვალიდან ადმინისტრაციასთან აღარ შეუშვებენ მანქანებს, რომელთაც ხელმძღვანელობისთვის საჭმელი მიაქვთ. დღეს ეს მანქანები შეუშვეს.

ვალეს პარალელურად, აქციები მიმდინარეობს გარდაბანშიც. როგორც "სამხრეთის კარიბჭემ" გაარკვია, მოლაპარაკება გარდაბანშიც უშედეგოდ დასრულდა.

შეგახსენებთ, ვალეში, სამხრეთ კავკასიური გაზსადენის გაფართოების პროექტზე დასაქმებულები მეორე დღეა პროტესტის ნიშნად მუშაობაზე უარს აცხადებენ.

იხილეთ გუშინდელი დღის ქრონიკა.