მოხეში სადავო შენობის საქმესთან დაკავშირებით სასამართლოში სარჩელი შეიტანეს

„ადამიანის უფლებების სწავლებისა და მონიტორინგის ცენტრი“ (EMC) თბილისის საქალაქო სასამართლოში საჯარო ინფორმაციის მიღების მოთხოვნით, რელიგიის საკითხთა სახელმწიფო სააგენტოს უჩივის.

როგორც EMC–ის წარმომადგენლები აცხადებენ, მიუხედავად იმისა, რომ კომისია თითქმის ერთი წელია ფუნქციონირებს, კომისიის საქმიანობის შედეგი დღემდე დადებული არ არის. ასევე, მთლიანად დახურულია კომისიის საქმიანობა სხვა დაინტერესებული პირებისთვი.

EMC–იმ სააგენტოს განცხადებით 2015 წლის 17 აგვისტოს მიმართა და კომისიის საქმიანობასთან დაკავშირებული საჯარო ინფორმაცია გამოითხოვა. EMC ამ დრომდე გამართული სხდომებისა და კომისიის მიერ დადგენილი მეთოდოლოგიის, ასევე, ამ პროცესში სააგენტოს მონაწილეობის, კომისიის ფარგლებში მიწვეული ექსპერტებისა და სპეციალისტების საქმიანობის შესახებ დაინტერესდა. ორგანიზაცია სააგენტოსგან აღნიშნული ექსპერტებისა და სპეციალისტების მიერ სადავო შენობა-ნაგებობის თაობაზე მომზადებული კვლევების, რეკომენდაციებისა და სხვა დოკუმენტების ასლების წარმოდგენას ითხოვდა. გარდა ამისა EMC დაინტერესდა რა ეტაპზეა კომისიის საქმიანობა ამჟამად და როდის იგეგმება საბოლოო, შემაჯამებელი რეკომენდაციის გაცემა.

EMC– ის წარმომადგენლების თქმით, სააგენტომ უარი განაცხადა მოთხოვნილი ინფორმაციის გაცემაზე იმ არგუმენტით, რომ კომისია არ წარმოადგენდა საჯარო დაწესებულებას და შესაბამისად არ იყო ვალდებული გაეცა საჯარო ინფორმაცია: „მითითებული პასუხით, კომისიამ არასწორად შეაფასა მოსარჩელის მიერ მოთხოვნილი ინფორმაცია. კერძოდ კი, EMC-ს წერილებით მოთხოვნილი იყო არა კომისიის მხრიდან საჯარო ინფორმაციის გაცემა, არამედ სააგენტოს მიერ, მისი სამსახურეობრივი უფლებამოსილების ფარგლებში, კომისიასთან დაკავშირებული საჯარო ინფორმაციის გაცემა“.

ორგანიზაციაში აცხადებენ, რომ სააგენტოს მხრიდან კომისიის საქმიანობის მსგავსი დახურულობა ხელს უშლის მითითებულ საკითხზე საზოგადოებრივი დისკუსიის წამოწყებას და წარმოადგენს გადაწყვეტილების მიღების პროცესის არადემოკრატიულ და გაუმჭვირვალე პროცედურას.

[თამუნა უჩიძე, ახალციხე]