ე.წ. მოხეს კომისიის გადაწყვეტილებაზე დღეს მუსლიმები განცხადებას გაავრცელებენ

"დღეს, 25 ნოემბერს, 13:00 საათზე სოფელი მოხის ადგილობრივი მუსლიმი თემი, ისტორიული ნაგებობის შენობასთან პარასკევის ტრადიციულ (ჯუმას) ლოცვას კვლავ ღია ცის ქვეშ წაიკითხავს და ამავდროულად კრიტიკულ საჯარო განცხადებას გააკეთებს რელიგიის საკითხთა სახელმწიფო სააგენტოს მიერ შექმნილი კომისიის საქმიანობასთან დაკავშირებით", – ნათქვამია პრესრელიზში, რომელიც, მოხის მუსლიმი თემის თხოვნით, ადამიანის უფლებების სწავლებისა და მონიტორინგის ცენტრმა გაავრცელა.

პრესრელიზის მიხედვით, მოხის კომისიის ბოლო განცხადებების გათვალისწინებით, მუსლიმები გამოთქვამენ წუხილს, რომ სახელმწიფო არ უზრუნველყოფს სადავოდ გამხდარი შენობის ისტორიული და კონფესიური მესაკუთრის საკითხის დადგენას და საერთოდ უარს იტყვის შენობის ისტორიული მესაკუთრისთვის დაბრუნებაზე, რაც სახელმწიფოს დისკრიმინაციული რესტიტუციის პოლიტიკის შედეგია. მუსლიმების თქმით, მათი მოთხოვნა არსებითად არა ლოცვისთვის სივრცის მიცემა, არამედ ისტორიული შენობის ნამდვილი მესაკუთრისთვის დაბრუნების პროცესის სამართლიანი დაგეგმვა და განხორციელებაა.

EMC ხაზს უსვამს, რომ მითითებული განცხადება არ წარმოადგენს მის საკუთარ განცხადებას და აღნიშნულ ანონსს ადგილობრივი მუსლიმი თემის თხოვნით და მათ მხარდასაჭერად აგზავნის, რადგან უშუალოდ თემს ტექნიკურად მსგავსი კომუნიკაციის შესაძლებლობა არ აქვს.

[sknews.ge]