„სტიქია არ იყოო, აბა მე გადავხადე სახლს სახურავი?!“– ახალციხელის ქუჩაზე დახმარებას ითხოვენ

გუშინ, 12 ნოემბერს, ივანე ახალციხელის ქუჩაზე მდებარე საცხოვრებელ სახლს ძლიერმა ქარმა სახურავი მთლიანად გადახადა.

„თბილისში ვიყავი, მეზობლებმა დამირეკეს და მაშინვე წამოვედი“, – ამბობს დაზარალებული მარინა გიორგაძე.

მისი თქმით, მასთან მერიის ინფრასტრუქტურის თანამშრომლები მივიდნენ, თუმცა დაეხმარებიან, თუ არა არ იცის: „მოვიდნენ და მითხრეს ეს სტიქია არ იყოო, აბა მე გადავხადე სახლს სახურავი?! სტიქია მთელ ქალაქში უნდა იყოსო. როგორ მოვიქცე არ ვიცი! ვინმემ ხომ უნდა იფიქროს ჩვენზე. წვიმა, რომ მივიდეს მთელ სახლს დამიზიანებს“.

ახალციხის მერიაში, კი აცხადებენ, რომ ვიდრე ზარალის დამთვლელი კომისია შეიქმნება, მანამდე მეტეოროლოგიური სადგურიდან დასკვნას ელოდებიან: „დასკვნა უნდა მოვიდეს სადგურიდან მერიაში, რომ სტიქია ნამდვილად იყო. ვიდრე არ მოვა, ვერ დავემხარებით“– განაცხადა, მერიის საზოგადოებასთან ურთიერთობის სამსახურის წარმომადგენელმა სოფო მესხმა.

შეგახსენებთ რომ , გუშინ, 12 ნოემბერს ძლიერმა ქარმა ახალციხეში რამდენიმე საცხოვრებელი სახლი დაზიანდა. უამინდობის გამო ჩაიკეტა ტიკმატაჟისა და გოდერძის უღელტეხილები. წალკა–ნინოწმინდის გზაზე ჩარჩენილი იყვნენ მგზავრები.







[ვარლამ წიკლაური, ახალციხე]