წალკა–ნინოწმინდის გზაზე ჩარჩენილები შსს–ს თანამშრომლებს გამოჰყავთ

შინაგან საქმეთა სამინისტროს ინფორმაციით, მათ გუშინ ღამით 25, დღეს დილით კი ასევე, 25 მგზავრი გამოიყვანეს. ადგილზეა სამცხე–ჯავახეთის პოლიციის დეპარტამენტის დირექტორი თეიმურაზ კალანდაძე, მისი მოადგილე ვაჟა ბერძენიშვილი და ასევე ნინოწმინდის პოლიციის უფროსი გიორგი კიკალიშვილი.

„ჩვენთან ნინოწმინდის პოლიციის უფროსის მოადგილე ზოირაბ იგიტიანი მოვიდა და პიკაპით სამი მგზავრი სოფელ ფოკაში გადავყავართ. მანქანა ადგილზე დავტოვეთ“, – ამბობს ტიკმანტაჟის უღელტეხილზე ჩარჩენილი მგზავრებიდან ერთ–ერთი ჯამბულ ხმალაძე.

შინაგან საქმეთა სამინისტროს საზოგადოებასთან ურთიერთობის სამსახურში აცხადებენ, რომ მგზავრებისა და მანქანების გამოსაყვანად სამუშაოები ამ დრომდე გრძელდება.

შეგახსენებთ, რომ გუშინ ღამით დაახლოებით 24:00 საათიდან წალკა–ნინოწმინდის მიმართულებით უამინდობის გამო გზა ჩაიკეტა და იქ ათობით მგზავრი ჩარჩა.

[თამუნა უჩიძე, ახალციხე]