არიან თუ არა დაკარგულები წალკა–ნინოწმინდის გზაზე

შინაგან საქმეთა, ასევე, რეგიონული განვითარებისა და ინფრასტრუქტურის სამინისტროების ინფორმაციით, ამ დროისთვის ტიკმატაჟის უღელტეხილიდან ყველა მგზავრი გამოყვანილია. თუმცა, ადგილზე რჩება ავტომობილები და მათ გამოსაყვანად ტექნიკა ისევ მუშაობს.

საინფორმაციო სააგენტო jnews.ge ავრცელებს ინფორმაციას, რომ არიან დაკარგულებიც, თუმცა ამას არც ინფრასტრუქტურის და არც შინაგან საქმეთა სამინისტროში არ ადასტურებენ.

„ამ დროისთივს არ არის ცნობილი თუ რა ვითარებაა უღელტეხილის წვერზე. ტექნიკა მუშაობს და მივლენ იქამდეც. გზიდან ყველა მგზავრი უკვე გამოიყვანეს“, – ამბობენ შინაგან საქმეთა სამინისტროში.

„ჩარჩენილი იყო ერთი მანქანა, პოლიციელები მივიდნენ და ისინიც ჩარჩნენ, შესაძლოა ამას გულისხმობდნენ, მაგრამ ამ დროისთვის უკვე ყველა გამოყვანილია“, – ამბობს რეგიონული განვითარებისა და ინფრასტრუქტურის სამინისტროს საზოგადოებასთან ურთიერთობის წარმომადგენელი ხათუნა პაიჭაძე.

მისივე თქმით, მგზავრები გამოყვანილია, თუმცა გზა მაინც ჩაკეტილია, რადგან ამ მიმართულებით გადაადგილება, ჯერ ისევ სახიფათოა.

შინაგან საქმეთა სამინისტროში კი ამბობენ, რომ ავტომანქანები ჯერ ისევ გზაზეა და მათი გამოყვანა ამ დრომდე გრძელდება.

შეგახსენებთ, რომ გუშინ ღამიდან ტიკმატაჟის უღელტეხილი ჩაიკეტა და 50–ზე მეტი მგზავრი გზაში ჩარჩა;

[თამუნა უჩიძე, ახალციხე]