ახალციხის სასწავლო უნივერსიტეტში 1300 სტუდენტი სწავლობს. 40 პროცენტი სხვა რეგიონებიდანაა ჩამოსული, 20 პროცენტი კი სამცხე-ჯავახეთის მუნიციპალიტეტებიდან. სტუდენტების დიდი ნაწილი ყოველდღიურად სოფლებიდან დადის. ეს კი, როგორც უნივერსიტეტის ადმინისტარციაში ამბობენ სწავლების ხარისხზე ცუდად აისახება.
პირველკურსელი ნათია კაჭკაჭაშვილი ადიგენის მუნიციპალიტეტის სოფელ არალში ცხოვრობს. სტუდენტი ნაქირავებ ბინაში 80 ლარს იხდის, ამას კომუნალური გადასახადებიც ემატება.
- ”საერთო საცხოვრებელი რომ ყოფილიყო, ამით დიდ შეღავათს გაუწევდი ჩემს ოჯახს. თვეში სულ მცირე 100 ლარი მჭირდება. ჩემი ოჯახის შემოსავალი სოციალური დახმარება და მამის ხელფასი 40 ლარია”, - ამბობს იგი და ამატებს, რომ იმ შემთხვევაში, თუ სახელმწიფომ სწავლის გადასახადი არ დაუფარა, უნივერსიტეტის დატოვება მოუწევს.
ჰუმანიტარული მეცნიერებათა ფაკულტეტის ინგლისური ენის სპეციალობის მეორე კურსის სტუდენტი ნელი რურუა აბაშის მუნიციპალიტეტის სოფელ სეფიეთიდანაა. იგი, სამ მეგობართან ერთად, ვარძიის ქუჩაზე, ერთ ოთახში ცხოვრობს. ასე ქირის გადახდა უფრო მარტივია: ”თვეში სახლიდან სულ მცირე, 300 ლარი მომაქვს. იმის გამო, რომ შორს ვცხოვრობ და პროდუქტები ვერ მომაქვს, ძირითადად ნახევარფაბრიკატებით ვიკვებებით, რაც ხარჯებს ზრდის. განსაკუთრებით მძიმე ზამთრის პერიოდია, ქირას გათბობის 50 ლარიც ემატება”.
უნივერსიტეტის ადმინისტრაციამ წელს მძიმე სოციალური პირობების მქონე სტუდენტებისთვის პროფესორ-მასწავლებელთა საერთო საცხოვრებელში სამი ოთახი გამოყო, სადაც 12 ახალგაზრდა ცხოვრობს.
გიორგი ისაკაძე ბორჯომიდანაა. გასულ წელს ავტოავარიაში მოჰყვა და ჯანმრთელობის მდგომარეობის გამო მთელი წელი გააცდინა. ფინანსური პრობლემების გამო წელს ბინის დაქირავება ვეღარ შეძლო და საერთო საცხოვრებელში ცხოვრობს: ”ოთახში ოთხი სტუდენტი ვვართ, ყველა კერძს კარტოფილისგან ვამზადებთ. რომ არა ეს საერთო საცხოვრებელი, არ ვიცი რას ვიზამდი”.
ახალციხის სახელმწიფო სასწავლო უნივერსიტეტის რექტორი თინა გელაშვილი ამბობს, რომ 2008 წლის გაზაფხულზე სტუდენტური ქალაქის აშენებისთვის საქართველოს პრეზიდენტს ნებართვა სთხოვა. გაკეთდა პროექტიც, რომელიც ითვალისწინებდა სტუდენტური ქალაქის მშენებლობას ექვს ჰექტარზე. აქ უნდა ყოფილიყო საცხოვრებლების კორპუსები, გასართობი ცენტრები, სპორტული მოედნები და სამეცნიერო ბიბლიოთეკა. პრეზიდენტმა თანხმობა განაცხადა იმ შემთხვევისთვის, თუ უნივერისტეტის ადმინისტრაცია საკუთარი ხარჯებით მშენებლობის ერთ წელიწადში დამთავრებას უზრუნველყოფდა.
- ”უნივერსიტეტის ბიუჯეტი ორ მილიონ ლარამდეა. ასეთი გრანდიოზული მშენებლობის ერთ წელიწადში დასრულებას ვერ მოვახერხებდით. ამიტომ იძულებული გავხდით უარი გვეთქვა პროექტზე”, - განაცხადა გელაშვილმა.
უნივერისტეტის ადმინისტრაციაში საერთო საცხოვრებლის მშენებლობის საკითხი კვლავ აქტუალურია. რექტორის განმარტებით, სამსართულიანი საერთო საცხოვრებელი კორპუსის მშენებლობა პირველი ადმინისტრაციული შენობის გვერდით, სტადიონის ტერიტორიაზე იგეგმება. თუმცა, იმის გათვალისწინებით, რომ მშენებლობის ხარჯები უნივერსიტეტმა უნდა დაფაროს, მშენებლობის პროცესის მალე დასრულება რთული იქნება. შესაბამისად, სტუდენტებს ნაქირავებ ბინებში კიდევ დიდხანს მოუწევთ ცხოვრება.
[თინათინ ზაზაძე, ახალციხე]