დღის კითხვა: უნდა ჰქონდეს თუ არა უნივერსიტეტს სტუდენტთა საცხოვრებელი [Video]

სამცხე–ჯავახეთის სახელმწიფო უნივერსიტეტში 1400 სტუდენტი სწავლობს, მათი დიდი ნაწილი რეგიონის სხვადასხვა სოფელში ცხოვრობს. ახალციხეში სასწავლებლად ჩამოსულ სტუდენტთა ნაწილი ბინას ქირაობს, ახლომდებარე სოფლების მცხოვრებლები კი სასაწავლებელში საქალაქთაშორისო ტრანსპორტს დაჰყვებიან.

უნივერსიტეტის ადმინისტრაცია წლებია ცდილობს სასწავლებლის სტუდენტებისთვის საერთო საცხოვრებელი ააშენოს. ადგილი,სადაც პატარა სტუდენტური ქალაქის გაკეთება შეიძლება, ახალციხეში არსებობს კიდეც. თუმცა, რადგან მერიის ბალანსზე არ არის, ეს საკითხი დროში ჭიანურდება.

უნივერსიტეტის საერთო საცხოვრებელზე 11 მარტს, ახალციხეში სტუმრობისას, საქართველოს განათლებისა და მეცნიერების მინისტრმა თამარ სანიკიძემაც ისაუბრა. "ჩვენ ამ ბოლოს ვმუშაობთ იმაზე, რომ რეგიონულ უნივერსიტეტებს ჰქონდეთ საერთო საცხოვრებლები. ეს დაეხმარება მათ სტუდენტების მოზიდვაში", – განაცხადა მინისტრმა "სამხრეთის კარიბჭესთან" ინტერვიუში.

უნივერსიტეტისთვის საერთო საცხოვრებლის ასაშენებლი ტერიტორიის გამოყოფაზე საუბრობს ახალციხის მერიც."სამხრეთის კარიბჭესთან" საუბარში ახალციხის მერმა გიორგი კოპაძემ განაცხადა, რომ ყოფილი სამხედრო დასახლების ტერიტორიაზე პატარა ქალაქის გაშენებას გეგმავს, სადაც იქნება სტუდენტებისთვის საერთო საცხოვრებელიც. ამისათვის, საჭირო ტერიტორია უნივერსიტეტს გადაეცემა.

სად და როგორ ცხოვრობენ სამცხე–ჯავახეთის სახელმწიფო უნივერსიტეტის ის სტუდენტები, ვინც ახალციხიდან არ არის და უნდა ჰქონდეს თუ არა უნივერსიტეტს სტუდენტთა საცხოვრებელი – "სამხრეთის კარიბჭემ" სამცხე–ჯავახეთის სახელმწიფო უნივერსიტეტის სტუდენტები გამოკითხა.

[თინათინ ზაზაძე, ოთარ აწყურელი, ახალციხე]