როდის მოეწყობა ახალქალაქში სტუდენტური საცხოვრებელი?

სამცხე–ჯავახეთის სახელმწიფო უნივერსიტეტის სტუდენტებისთვის ახალქალაქში საერთო საცხოვრებელი, უნივერისტეტის მიმდებარე ტერიტორიაზე, ყოფილი პროფესიული ტექნიკური სასწავლებლის საერთო საცხოვრებელში განთავსდება.

ოთხსართულიანი შენობის რეაბილიტაციას, რომელიც 800 ათასი ლარი ჯდება, განათლებისა და მეცნიერების სამინისტრო დააფინანსებს.

„საკმაოდ ხანგრძლივი პროცესია პროექტის იურიდიული და ეკონომიკური მხარის მოგვარება. ჩემი თანამშრომელი წასულია თბილისში საბოლოო შეჯერებისთვის და უახლოეს მომავალში დავიწყებთ საცხოვრებლის რეაბილიტაციას. თუმცა, მანამდე ტენდერი უნდა გამოვაცხადოთ“, – ამბობს სამცხე–ჯავახეთის სახელმწიფო უნივერსიტეტის რექტორი მერაბ ბერიძე.

მისივე თქმით, საერთო საცხოვრებლის რეაბილიტაციის პროცესს მონიიტორინგს განათლებისა და მეცნიერების სამინისტრო გაუწევს.

ყოფილი პროფესიული ტექნიკური სასწავლებლის საერთო საცხოვრებელი, სამცხე–ჯავახეთის სახელმწიფო უნივერსიტეტის ბალანსზეა. ამ დროისთვის ახალქალაში 60 სტუდენტი სწავლობს. უნივერსიტეტის რექტორის განმარტებით, საერთო საცხოვრებელში სტუდენტებთან ერთად პროფესორ–მასწავლებლებიც იცხოვრებენ.

როდის დასრულდება შენობის რეაბილიტაცია უცნობია: „რომ ყოფილიყო მარტში ან აპრილში ეს დაფინანსება, წელს მოვასწრებდით. ნახევარი მაინც რომ ავითვისოთ, სახურავი რომ გადავხუროთ და ფანჯრები ჩავსვათ კარგია, რადგან ნოემბრის თვიდან ახალქალაქში უკვე სიცივეა“, – განმარტავს მერაბ ბერიძე.

მისივე თქმით, აუცილებელია, რომ საერთო საცხოვრებელი ახალციხეშიც იყოს. სამცხე–ჯავახეთის სახელმწიფო უნივერისტეტის ხელმძღვანელობა ალტერნატიული ფართის გადაცემას გასული საუკუნის 90–იან წლებიდან ითხოვს.

„მესაზღვრეების ყოფილი საცხოვრებლის გადაცემას ვითხოვდით. საუბარი გვქონდა გუბერნატორთან და ახალარჩეულ მერთანაც, წინასაარჩევნო პერიოდში. შენობის გადმოცემის სურვილი არის, მაგრამ, გადმოცემა ბევრს არაფერს ნიშნავს, მთავარია მისი რეაბილიტაცია, თანხების მოძიება. ეს სერიოზული და შრომატევადი საქმეა. ჩვენ ფინანსურად მთლიანად სტუდენტურ შემოსავლებზე ვართ დამოკიდებული. მეტი დახმარება სჭირდება უნივერსიტეტს“, – აცხადებს მერაბ ბერიძე.

[თინათინ ზაზაძე, ახალციხე]