სამცხე–ჯავახეთის უნივერსიტეტში სწავლა დაიწყო

2016–2017 სასწავლო წელს სამცხე–ჯავახეთის სახელმწიფო უნივერსიტეტმა, ახალციხისა და ახალქალაქის კორპუსებში, მსურველები ოთხ მიმართულებაზე: პროფესიული სწავლების, ბაკალავრიატის, მაგისტრატურისა და დოქტორანტურის საფეხურებზე მიიღო. მთლიანობაში, უნივერსიტეტში სწავლას 440 პირველკურსელი დაიწყებს.

"თუ გავითვალისწინებთ, რომ გვაქვს 2 000 ადგილი კვოტა და მაღალ კურსებზეც დაახლოებით ამდენი სტუდენტი გვყავს, თითქმის უნივერსიტეტის მთლიანი კვოტა შევსებულია. ბაკალავრიატში, სტუდენტების დაახლოებით 70% უფასო პროგრამებზე ჩაირიცხა“,–განმარტავს უნივერსიტეტის რექტორის მოადგილე სასწავლო მიმართულებაში, ნიკოლოზ ახალკაცი.

ახალ სასწავლო წელს ბაკალავრიატში უნივერსიტეტმა 268 სტუდენტი მიიღო. მათთვის ყველაზე პრიორიტეტული ის პროგრამები აღმოჩნდა, რომლებსაც სახელმწიფო სრულად აფინანსებს. ეკონომიკის, ისტორიისა და ქართული ფილოლოგიის პროგრამებზე 164 სტუდენტი ჩაირიცხა. მათ სწავლის საფასურს სახელმწიფო სრულად დაუფარავს.

54 სტუდენტი მიიღო უნივერსიტეტმა მაგისტრატურაში, თუმცა სასწავლო პროცესის დაწყების პირველივე კვირას, ადმინისტრაცია მაგისტრატურის მიმართულებით მიღების გამოცხადებას კიდევ ერთხელ გეგმავს.

დოქტორანტურის საფეხურზე უნივერსტეტში სწავლას 12 მსურველი გააგრელებს. ისინი ხუთ პროგრამაზე – ქართული ლიტერატურის, ეთნოლოგიის, ინფორმაციულ ტექნოლოგიებისა და ეკონომიკის მიმათულებებზე ისწავლიან.

გარდა ამისა, უნივერსიტეტმა 27 სტუდენტი ქართული ენის პროგრამაზე მიიღო, რომლებიც სომხურენოვანი მსმენელები არიან.

უნივერსიტეტში სწავლა დაიწყეს რეპატრირებული მესხების შთამომავლებმა. აზერბაიჯანის მოქალაქე 28 ახალგაზრდა, ახალციხეში იცხოვრებს და სპეციალური პროგრამით ისწავლის.

"დღეს ინტერნაციონალიზაცია უნივერსიტეტებში ხდება ინგლისურენოვანი ან სხვა ენოვანი პროგრამებით. ჩვენთან კი ეს ხდება ქართულენოვანი პროგრამით, ამიტომ არის უნიკალური. ეს იყო ჩემი პირადი შეთავაზება და მხარი დამიჭირა სამინისტრომ. მათ ცხოვრებას სპეციალური პროგრამები დააფინანსებს“,– ამბობს უნივერსიტეტის რექტორი მერაბ ბერიძე.

სამცხე–ჯავახეთის სახელმწიფო უნივერსიტეტის მესამე კორპუსში, ახალქალაქში, სულ 38 პირველკურსელი ისწავლის. მათგან 34 ქართული ენის პროგრამაზეა, სომხურენოვანი მსმენელებისათვის. ხოლო ბაკალავრიატში, ეკონომიკის მიმართულებით, ოთხი სტუდენტი ისწავლის.

[თაკო ფეიქრიშვილი, ახალციხე]