ახალქალაქში გადასახადების შემცირებას ელიან

ოქტომბრის ბოლო, კოკისპირული, დაუსრულებელი წვიმისა და სიცივის სეზონის დასაწყისი, სიცივე, რაც ხანგრძლივი თვეების განმავლობაში გრძელდება, დიდ ხარჯებთან და სოლიდურ კომუნალურ გადასახადებთან ასოცირდება.
ახალქალაქის მცხოვრებლებისთვის გათბობის სეზონი დაიწყო, რაც ნიშნავს, რომ ელექტროენერგიისა და ბუნებრივი აირის ხარჯი, სულ მცირე, გაორმაგდება.

ბევრისთვის ბუნებრივი აირის შეყვანა ძვირი სიამოვნებაა, ელექტროენერგიით გათბობა კი გაცილებით მეტი უჯდებათ. გაზის ნაცვლად გამოსავალი შეშა და ღუმელია. შუქს კი მხოლოდ ნათურებისა და ტელევიზორებისთვის იყენებენ. მოსახლეობა მაქსიმალურ ეკონომიას აკეთებს.

ადგილობრივ მცხოვრებლებს იმედი აქვთ, რომ ახალი ხელისუფლება წინასაარჩევნო დაპირებებს შეასრულებს. კერძოდ, ელექტროენერგიაზე, ბუნებრივ აირზე და სხვა კომუნალურ გადასახადებზე, ტარიფებს შეამცირებს.

მაკარიანების ოჯახი ზამთარშიც და ზაფხულშიც დიდ კომუნალურ გადასახადებს იხდის და არავის დახმარებას არ ელოდება.

"ზაფხულში დენსა და გაზში სულ მცირე 70 ლარს ვიხდით. ზამთარში ელექტროენერგიის გადასახადი 80-85 ლარია, ბუნებრივი აირის კი 390-400 ლარი. რა ვქნათ, ჩვენთან ყინვები იცის, სახლში კი ბავშვი გვყავს, სიცივეში ხომ ვერ ვიქნებით?! ველოდებოდით, რომ საპარლამენტო არჩევნების შემდეგ 1000 -არიან ვაუჩერებს მოგვცემდნენ და ეს კარგი დახმარება იქნებოდა. ახლა კი მესმის, რომ დახმარებას არსაიდან აღარ შეიძლება ველოდოთ. დავიცდით, სანამ ახალი მთავრობა მოსახლეობისკენ ნაბიჯებს გადმოდგამს", - ამბობს სალვი მაკარიანი.

ასმიკ მკრტჩიანის ოჯახი ზაფხულობით დენსა და გაზზე ბევრს არ ხარჯავს, ზამთარში კი კომუნალურ გადასახადებში საკმაოდ დიდ თანხებს იხდის. ისინი უკმაყოფილებას იმაზეც გამოთქვამენ, რომ თუ 100 კილოვატზე მეტი ელექტროენერგია დახარჯეს, უფრო მაღალი ტარიფით უწევთ გადახდა.

"გასულ თვეში დენისთვის 22 ლარი, გაზისთვის კი 15 ლარი გადავიხადეთ და პრაქტიკულად, არაფერი ჩაგვირთავს. ჩემთვის მიუღებელია, რომ თუ დენი 100 კილოვატზე მეტი დაიხარჯა, ფასი ორმაგდება. ვფიქრობ, ეს ძალიან ძვირია. პირიქით უნდა იყოს. თუ ბევრი ელექტროენერგია დახარჯე, ნაკლებს უნდა იხდიდე და არა ისე, როგორც ჩვენთანაა. ჩვენი სახლი დიდია და გამოდის, რომ ზამთარში ბუნებრივ აირში 320-340 ლარს ვიხდით. ველოდებით, რომ ახალი მთავრობა კომუნალურ გადასახადებს 20-30%-ით შეამცირებს", - ამბობს ახალქალაქის მცხოვრები ასმიკ მკრტჩიანი.

ანიჩკა ერანოსიანსაც გაზისა და დენის ტარიფების შემცირების იმედი აქვს.

"რასაკვირველია, ძვირია. გაზი თვეში 200-250 ლარი გვიჯდება. ახალი მთავრობა დაგვპირდა, ვნახოთ, შეასრულებენ დანაპირებს თუ არა. ოჯახში სამი ადამიანი ვმუშაობთ, რომ კომუნალური გადასახადების გადახდა შევძლოთ", - ამბობს იგი.

ზოგი კი, ეკონომიის მიზნით, ბუნებრივ აირს საერთოდ არ იყენებს.

"გაზი არ გაგვიყვანია, ძალიან ძვირია. ჩვენ ამის საშუალება არ გაგვაჩნია. დენისთვის თვეში 8-10 ლარს ვიხდით, ჩვენთვის ეს თანხაც დიდია. ველოდებით, გადასახადები როდის დაიკლებს", - ამბობს ლუსია ჰარუთიუნიანი.

სილვა ზადოიანის ოჯახში გადაწყვიტეს გათბობისთვის ისევ შეშა გამოიყენონ, რადგან მათი გათვლებით, გაზი უფრო ძვირი დაუჯდებათ.

"თვეში 20-25 ლარს ვიხდით, ჩართვით კი მხოლოდ ნათურა და ტელევიზორი გვაქვს ჩართული. გაზიც ძვირია, ამიტომ ისევ შეშა ვიყიდეთ. ზამთარში გაზით გათბობას ვერ შევწვდებით და შეგვცივდება. გათბობაზე ეკონომიის გაკეთება არ შეიძლება. კარგი იქნებოდა, დენი და გაზი უფრო იაფი რომ იყოს", - ამბობს სილვა ზადოიანი.

[ქრისტინა მარაბიანი, ახაქალაქი]