რატომ არ მოსწონთ დევნილებს 45-ლარიანი შემწეობა?

ელგუჯა როსტობაია ლიკანში, ყოფილი სანატორიუმის შენობაში მას შემდეგ ცხოვრობს, რაც აფხაზეთიდან იძულებით წამოვიდა. ოჯახი ელექტროგამათბობლით თბება.

„შეშის ღუმელი რომ დავდგა, შეშა არ მაქვს, ფიჩხები რომ მოვაგროვო, 1000 ლარია ჯარიმა, ამიტომ, ზამთარში დენის გამათბობელით ვთბებით. როგორც ჩანს, მარტიდან ელექტროენერგიას შეზღუდვით გამოვიყენებთ“, - ამბობს იგი.

ელგუჯა როსტობაია ფიქრობს, რომ სახელმწიფოს მიერ მიღებული გადაწყვეტილება მათ პირიქით დააზარალებთ : „თვეში დენის გადასახადი 70, ხანდახან 80 ლარიც მომდის, 45 ლარით კომუნალურებიც გადავიხადო და საჭმელიც ვიყიდო?!“

როსტობაიას მსგავსად ფიქრობს ბორჯომში, სანატორიუმ „ლიკანი 2“-ში კომპაქტურად ჩასახლებულ დევნილების უმეტესობა. მათ დევნილთა შესახებ კანონპროექტში შესული ცვლილებები არ მოსწონთ და ამბობენ, რომ ახალი ინიციატივით სახელმწიფო მათ სოციალურ მდგომარეობას კიდევ უფრო ამძიმებს.

„საქართველოს ოკუპირებული ტერიტორიებიდან იძულებით გადაადგილებულ პირთა-დევნილთა შესახებ“ კანონპროექტში შესული ცვლილებების თანახმად, იძულებით გადაადგილებულ პირთა შემწეობა 45 ლარამდე იზრდება, თუმცა სახელმწიფო მათ კომუნალურ გადასახადს აღარ გადაუხდის. ცვლილება ძალაში მიმდინარე წლის პირველ მარტს შევა.

ამჟამად, კომპაქტურად ჩასახლებული დევნილები, თვეში, შემწეობის სახით, 22 ლარს იღებენ. სახელმწიფო დამატებით მათ კომუნალურ გადასახადებსაც ფარავს. კერძო სექტორში განსახლებული დევნილები კი, რომლებიც კომუნალურ გადასახადებს თავად იხდიან, სახელმწიფოსგან 28 ლარს იღებენ.

[მანანა სარაშვილი, ახალციხე]