ახალქალაქის სოფლებში გაზიფიკაცია გვიანდება

– რომელ სოფლებში მიმდინარეობს გაზიფიცირების სამუშაოები ამ ეტაპზე და რა მიზეზით დაგვიანდა ბუნებრივი აირის შეყვანა სოფლებში?

ახალქალაქის მუნიციპალიტეტის 25 სოფელში ბუნებრივ აირს გასული წლიდან იყენებენ. მარტის ბოლოს და აპრილის დასაწყისში გაზი შემდეგ სოფლებში გავუშვით: ხადო, აზავრეთი, დრკნა, ბუღაშენი, მაჯადია, ალასტანი და გოკიო. ამ სოფლებში გაზი უკვე შესულია, თუმცა ჯერ ბუნებრივი აირი ყველა აბონენტს არ აქვს.

სოფლებში კიროვაკანი, კუმურდო, კოთელია, ბახლო, მურჯახეთი ბუნებრივი აირის მოხმარებას 15–20 დღის შემდეგ შეძლებენ. გაზი სოფლებამდე მივიყვანეთ, თუმცა გარკვეული ხარვეზებია, რომელთა გამოსწორებაზეც ვმუშაობთ და მაქსიმუმ 15–20 დღის შემდეგ ბუნებრივი აირი მათაც ექნებათ. სოფელ დრკნაში და ბახლოში ბუნებრივ აირს უახლოეს დღეებში გავუშვებთ.

ყველა სოფელში, სადაც ხელშეკრულებები დადებული გვაქვს და თანხის ნაწილი გადახდილია, გაზიფიცირების პროცესი მაისის ბოლომდე დასრულდება. მართალია, ხელშეკრულების მიხედვით ცოტა დავიგვიანეთ, მაგრამ ეს ობიექტური მიზეზების გამო მოხდა. ჩვენ 11,000 აბონენტი უნდა მოგვემარაგებინა ბუნებრივი აირით, მაგრამ განაცხადებები გაცილებით მეტი იყო. 13,000–მდე, ანუ 2,000–ით მეტი აბონენტი მივიღეთ. მემორანდუმით გათვალისწინებული მასალები შემოვიტანეთ, 2,000 აბონენტი დაგვემატა და ამიტომ სამშენებლო მასალები საკმარისი არ აღმოჩნდა. ამ მასალებს თურქეთიდან ვიღებთ და მცირე ოდენობით შემოტანა არ შეგვიძლია. რაც ჩვენი ბრალი არაა. ასევე ამინდისა და ხანდახან ჩვენი მიზეზითაც კი სამუშაოები გაჭიანურდა.

– თუმცა, უკვე წელიწადი გავიდა, რაც კონკტრაქტს ხელი მოაწერეთ, მაგალითად, სოფელ ბახლოში, დრკნაში, არაგვაში, მაჯადიასა და ასე შემდეგ...

არა, წელიწადი არაა გასული. ხელშეკრულებები შემოდგომით შევადგინეთ და დეკემბრის ბოლომდე გაზიფიცირების პროცესი უნდა დასრულებულიყო. როგორც იცით, ზამთარში ჩვენთან მუშაობა შეუძლებელია, ამ სოფლებში გაზიფიცირების პროცესი ამიტომ გაჭიანურდა. ჩვენი ვალდებულება აბონენტების რაოდენობის მიხედვით, სრულად შევასრულეთ და წლის ბოლომდე უფრო მეტსაც გავაკეთებთ.
– ხალხი ჩივის, რომ გაზიფიცირება უხარისხოდ მიმდინარეობს...

3–4 სამსახური გვაქვს: საინჟინრო, საპროექტო განყოფილება, გაზის გამშვები, ტექნიკური უსაფრთხოება, ყველაფერს ჩვენი სპეციალისტები აკეთებენ. ჩვენ მხოლოდ მშენებლები არ ვართ, რომ ავაშენოთ, წავიდეთ და ჩვენს მერე რა მოხდება, აღარ დაგვაინტერესოს. ექსპლუატაციაში ჩვენ ვუშვებთ, ხვალ მოუწესრიგებლობის გამო ისევ ჩვენ გვექნება პრობლემები, ავარია თუ მოხდა, ისევ ჩვენ დავზარალდებით. უკვე 5 წელია ვმუშაობთ და ღმერთს მადლობა, რანაირი უბედური შემთხვევა არ მომხდარა, რადგან ძალიან მკაცრად ვამოწმებთ ყველაფერს.

[აღუნიკ აივაზიანი, ახალქალაქი]