ენმ ახალციხე: აქცია 'ოცნების' მიერ დაქირავებულმა ზონდერ ბრიგადებმა მოაწყეს

აქციაზე "ერთიანი ნაციონალური მოძრაობის" ახალციხის რაიონული ორგანიზაციიდან არავინ გასულა. ორგანიზაციის თავმჯდომარე გელა დემეტრაძე აქციის დროს ახალციხეში არ იმყოფებოდა და ფაქტის შესახებ ტელეფონით შეიტყო.

მისი თქმით, NDI–ის კვლევის შემდეგ ხელისუფლება მსგავსი ძალებით გააქტიურდა. დემეტრაძის ინფორმაციით, აქციის მონაწილეები ადგილობრივები არ იყვნენ და ხელისუფლებას ზონდერ ჯგუფები ჰყავს დაქირავებული.

"დღევანდელ ხელისუფლებას სხვა აღარაფერი დარჩენია, გარდა იმისა, რომ მსგავსი ქმედებებით აჟიოტაჟი გამოიწვიოს ხალხში. ზონდერ ბრიგადა ჰყავთ, რომლებიც არ იყვნენ ადგილობრივები, ჩამოყვანილები ჰყავთ და საქართველოს ბევრ ქალაქში მოაწყვეს მსგავსი აქცია", – ამბობს გელა დემეტრაძე და ამატებს, რომ დღევანდელი ხელისუფლება არ აღიარებს, რომ ეს მათი დავალებით ხდება და შესაბამისად არც მათივე დაქირავებული ჯგუფები იტყვიან, რომ "ქართული ოცნების" დაკვეთას ასრულებენ.

რაც შეეხება იმ ფაქტს, რომ აქციის მონაწილეები ბოლო დროს ინტერნეტში გავრცელებულ წამების ამსახველ კადრებს აპროტესტებდნენ, გელა დემეტრაძე ამბობს, რომ არცერთ საღად მოაზროვნე ადამიანს არ მოსწონს მსგავსი ძალადობის ფაქტები და აუცილებლად უნდა იქნეს გამოძიებული.

"პირველ რიგში მე და ყველა ჩემი თანამოაზრე მომხრეა იმის, რომ გამოძიებული იქნეს დეტალურად და ობიექტურად და დაისაჯოს ყველა მოძალადე, შემსრულებელი თუ დამკვეთი, რომ ამაზე საერთოდ მორჩეს საუბარი. მაგრამ საქმე იმაშია, რომ ის ძალადობაში მონაწილე პირები დღევანდელ ხელისუფლებას ემსახურებიან", – ამბობს გელა დემეტრაძე.

მისივე თქმით, "ერთიანი ნაციონალური მოძრაობის" ახალციხის რაიონული ორგანიზაცია მუშაობას ჩვეულ რეჟიმში აგრძელებს.

შეგახსენებთ, რომ დღეს, 19 ოქტომბერს "ერთიანი ნაციონალური მოძრაობის" ახალციხის რაიონულ ორგანიზაციასთან დაახლოებით 30–მდე ადამიანი შეიკრიბა და ორგანიზაციას კარი აუჭედეს.

ამ დროისთვის "ერთიანი ნაციონალური მოძრაობის" ახალციხის რაიონული ორგანიზაციასთან ექსპერტ–კრიმინალისტები მუშაობენ.

საქართველოს შინაგან საქმეთა სამინისტროს ინფორმაციით, მომხდარზე გამოძიება სსკ 226–ე მუხლით მიმდინარეობს, რაც გულისხმობს ჯგუფური მოქმედების ორგანიზებას, რომელიც არღვევს საზოგადოებრივ წესრიგს ან მასში აქტიური მონაწილეობას. აღნიშნული ქმედება ისჯება ჯარიმით ან საზოგადოებისთვის სასარგებლო შრომით ვადით 120–დან 180 საათამდე, გამასწორებელი სამუშაოთი ვადით ორ წლამდე ან თავისუფლების შეზღუდვით ვადით სამ წლამდე.

[თამარ თოთაძე, ახალციხე]