გელა დემეტრაძე ქალაქში გაკრულ პლაკატებს მმართველ გუნდს უკავშირებს

„ერთიანი ნაციონალური მოძრაობის“ ახალციხის ორგანიზაციის ოფისში აცხადებენ, რომ ქალაქში მათ საწინააღმდეგო პლაკატების გაკვრა იმის მანიშნებელია, რომ მმართველი ხელისუფლება პანიკაშია.

„ის ფაქტი, რომ ოპოზიციას უწყობენ აქციებს, აკრავენ მათ საწინააღმდეგო პლაკატებს და ამზადებენ გაზეთებს პირველად მესმის, ეს იმის მანიშნებელია, რომ ხელისუფლება პანიკაშია და მათ მართლა მოუწევთ გადადგომა, ხელისუფლების დათმობა იმ ძალებისთვის ვისაც მართლა შეუძლია ქვეყნის მართვა და საქმის კეთება“, – ამბობს გელა დემეტრაძე.

მისივე თქმით ქალაქში პლაკატები მმართველი ხელისუფლების წახალისებით გაიკრა: „რა თქმა უნდა ქალაქში პლაკატები მმართველი ხელისუფლების ხელშეწყობით გაიკრა. ეს ყველაფერი დაკავშირებულია თანხებთან ამიტომ, ამას კერძო პირები ვერ გააკეთებდნენ“.

შეგახსენებთ, რომ „ერთიანი ნაციონალური მოძრაობის“ საწინააღმდეგო პლაკატები წარწერით „ყველა ციხეში“, „ორი გვამი მინდა“ „გასამართლდეს ნაცმოძრაობის დამნაშავე რეჟიმი“ ახალციხეში დღეს, 20 მარტს დილით გამოჩნდა.



[მანანა სარაშვილი, ახალციხე]