გელა დემეტრაძე: ეს არის მიზანმიმართული აქცია, ხელისუფლების დაგეგმილი და ორგანიზებული

„ვერ ვიტყვი, რომ ეს უბრალოდ ადამიანების ჯგუფის მიერ გამოხატული პროტესტია. ეს არის მიზანმიმართული აქცია, ხელისუფლების მიერ ორგანიზებული და დაგეგმილი, რომელიც უკავშირდება NDI-ს კვლევებს, ჩვენს მაღალ რეიტინგს. ვერანაირი წინასარჩევნო დაპირება ვერ შეასრულა „ქართულმა ოცნებამ“, კატასტრუფული სიჩქარით კარგავს მოსახლეობაში რეიტინგს და მხარდაჭერას, ყველაფერი კი ამის გადასაფარად ხდება“, – აცხადებს ენმ–ს ახალციხის რაიონული ორგანიზაციის ხელმძღვანელი გელა დემეტრაძე.

მისი თქმით, იმ შემთხვევაში, თუ სამართალდამცავი ორგანოები ობიექტურად გამოიძიებენ, შემსრულებლების ვინაობის დადგენა არ გაუჭირდებთ: „პოლიცია იყო მისული, საქმე აღძრულია. ყველამ იცის, რომელ მაღაზიაზე, სად რომელი ვიდეოთვალი აყენია და თუ ობიექტურად გამოიძიებენ ამ ფაქტს, შემსრულებლების დადგენა არ გაუჭირდებათ. ჩვენ არ მიგვიწვდება ამ ვიდეოკამერებზე ხელი, ვნახოთ როგორ განვითარდება მოვლენები“.

გელა დემატრაძე ძალადობის ამსახველ კადრებზეც საუბრობს, რომლებიც რამდნეიმე დღის წინ სოციალური ქსელით გავრცელდა: „მე და ჩემი მეგობრები ვემიჯნებით ძალადობას და მიუღებელია ჩვენთვის. შემსრულებელიც და დამკვეთიც უნდა დაისაჯონ კანონის მთელი სიმკაცრით, ამისთვის კი არაფერს აკეთებს დღევანდელი ხელისუფლება. ოფისებზე, რომელშიც უბრალო თანამშრომლები არიან, ასეთი ზიზღის გამოხატვა ჩემთვის მიუღებელია“.

შეგახსენებთ, დღეს, 22 ოქტომბერს, გამთენიისას, „ერთიანი ნაციონალური მოძრაობის“ ახალციხის რაიონული ორგანიზაციის შესასვლელი კარი, უცნობმა პირებმა წითელი საღებავით შეღებეს.

[თინათინ ზაზაძე, ახალციხე]