'ენმ' ახალციხე: ოფისი ღიაა და მუშაობას ვაგრძელებთ

"ერთიანი ნაციონალური მოძრაობის" რაიონულ ორგანიზაციასთან აქცია დღეს, 19 ოქტომბერს გაიმართა. ენმ–ს ოფისთან დაახლოებით 30–მდე ადამიანი შეიკრიბა და ორგანიზაციას კარი აუჭედეს. აქცია დაახლოებით ერთ საათს გაგრძელდა.

"მაშინ, როდესაც ენმ ახალციხის ორგანიზაციის წევრები ვიმყოფებოდით თბილისში, "რუსთავი 2-ის" მხარდამჭერ აქციაზე სიტყვის თავისუფლების დასაცავად, ხელისუფლებისგან წახალისებულმა პირებმა ისარგებლეს იმით, რომ მოცემულ მომენტში პარტიის ოფისში არავინ იმყოფებოდა და "უშიშრად" კარი აჭედეს. ჩვენი პარტიის ოფისი ღიაა და ვაგრძელებთ მუშაობას", – აცხადბენ "ერთიანი ნაციონალური მოძრაობის" ახალციხის ორგანიზაციაში.

აღნიშნულ ფაქტზე შსს–მ გამოძიება სსკ 226–ე მუხლით დაიწყო, რაც გულისხმობს ჯგუფური მოქმედების ორგანიზებას, რომელიც არღვევს საზოგადოებრივ წესრიგს ან მასში აქტიური მონაწილეობას. აღნიშნული ქმედება ისჯება ჯარიმით ან საზოგადოებისთვის სასარგებლო შრომით ვადით 120–დან 180 საათამდე, გამასწორებელი სამუშაოთი ვადით ორ წლამდე ან თავისუფლების შეზღუდვით ვადით სამ წლამდე.

ახალციხის რაიონულ ორგანიზაციაში განმარტავენ, რომ მიუხედავად დღევანდელი აქციისა, მუშაობას ჩვეულ რეჟიმში აგრძელებენ.

[თამარ თოთაძე, ახალციხე]