ქალი და ძალადობა

შეხვედრა დოკუმენტური ფილმის, ”ქალები საქართველოდან” ჩვენებით დაიწყო. ფილმის დასრულების შემდეგ, მონაწილეებმა ქალთა პრობლემებზე იმსჯელეს. შეხვედრაზე ყურადღება ემიგრანტი ქალების სოციალურ- ეკონომიკურ და ფსიქოლოგიურ მდგომარეობაზე გამახვილდა.

საზოგადოების ინფორმირებულობის გაზრდა; ქალთა ცნობიერების ამაღლება, და სამთავრობო და არასამთავრობო სექტორის კოორდინაცია, - ეს ის რეკომენდაციებია, რომელიც შეხვედრის მონაწილეებმა გაეროს ქალთა ფონდის სხდომაზე წარსადგენად შეიმუშავეს.

გაეროს ქალთა ორგანიზაციის კვლევის შედგად, ქორწინებაში მყოფი ყოველი მეთერთმეტე ქალი ფიზიკური ძალადობის მსხვერპლია. ძალადობის სხვადასხვა ფორმა კი 35%-მა განიცადა. ქალების 50% სიღარიბის ზღვარს მიღმა იმყოფება.

კვლევები ადასტურებს, რომ უმუშევრობის გარდა ქალების რთული სოციალურ- ეკონომიკური მდგომარეობა გამოწვეულია სიმბოლური შრომითი ანაზღაურებით, გახანგრძლივებული უხელფასო შვებულებებით და სხვა ფაქტორებით. ხოლო ეს ყველაფერი განაპირობებს მათ მიგრაციას სხვა ქვეყნებში.

გაეროს ქალთა ფონდის სამოქალაქო საზოგადოების მრჩეველთა საბჭოს წევრის, პროექტის ”ქალები ერთიანდებიან კონფლიქტის მიღმა” ექსპერტი გულიკო ბექაური ამბობს, რომ რეგიონიდან ქალების გადინების საკმაოდ მაღალი მაჩვენებელია. სამცხე-ჯავახეთიდან ქალების უმეტესობა საბერძნეთსა და თურქეთში მიდის.

”ფილმის ჩვენებისას გამოიკვეთა მთელი რიგი პრობლემები, რომელიც ხელს უწყობს ქალების ემიგრაციას საზღვარგარეთ. აქედან ყველაზე მთავარი ნეოლიბერალური პოლიტიკა, სოციალურ-ეკონომიკური პრობლემები და ქალის ინდივიდუალურ-ფსიქოლოგიური თავისებურებანია ”,-განმარტავს ბექაური და აქვე ამატებს, რომ გამოსავალს უმუშევრობის შემცირებასა და სამუშაო ადგილების გაზრდაში ხედავს.
ქალების უმეტესობა ძალადობის მსხვერპლი ინფორმაციის უქონლობის გამო ხდება. სწორედ ამიტომ, სამოქალაქო ცნობიერების ამაღლებაზე დისკუსიები მომავალშიც იგეგმება. შეხვედრებს ქალთა არასამთავრობო ორგანიზაცია ”თანხმობა” გამართავს.

დისკუსიები გაიმართება სტუდენტ ახალგაზრდობასთან, სამთავრობო და არასამთავრობო ორგანიზაციებთან და მედიასთან.

დღევანდელი შეხვედრა ”დემოკრატიული ჩართულობის ცენტრის” ინიციატივით შედგა. საზოგადოებისათვის აქტუალურ თემებზე ცენტრი შეხვედრებს ყოველი თვის ბოლოს მართავს. რა იქნება მომავალი შეხვედრის თემა, ამ დროისათვის უცნობია.

[თინათინ ზაზაძე, ახალციხე]