ახალციხეში გენდერული ძალადობის შემთხვევებზე იმსჯელეს

დისკუსია, რომელიც ’დემოკრატიული ჩართულობის ცენტრში’, ცენტრის ინიციატივით შედგა, გენდერული ძალადობის წინააღმდეგ მიმართული კამპანიის ფარგლებში მოეწყო.

შეხვედრას ძალადობის თემაზე მომუშავე ორგანიზაციები და ახალციხის მცხოვრებლები, ძირითადად ქალები ესწრებოდნენ. დამსწრეთა შორის მხოლოდ რამდენიმე მამაკაცი იყო.

არასამთავრობო ორგანიზაცია ”დემოკრატ ქალთა საზოგადოების” თავმჯდომარემ მარინა მოდებაძემ ძალადობის კონკრეტულ შემთხვევებზე ისაუბრა და აღნიშნა, რომ გამონაკლის შემთხვევებში, ორგანიზაციას მამაკაცებიც მიმართავენ.

- ”სტატისტიკურმა მონაცემებმა აჩვენა, რომ ძალადობის მსხვერპლი ძირითადად ქალები და ბავშვები ხდებიან. სამწუხაროდ, მსგავსი შემთხვევების რიცხვი ყოველწლიურად იმატებს”, - აღნიშნა ფსიქოლოგმა გულიკო ბექაურმა და ძალადობის ფსიქოლოგიურ მხარეზეც ისაუბრა.

შეხვედრაზე გენდერული ძალადობის წინააღმდეგ მიმართული ფილმიც აჩვენეს, რომელიც ”დემოკრატიული ჩართულობის ცენტრს” არასამთავრობო ორგანიზაცია ”სახლმა” მიაწოდა. ფილმის ჩვენების შემდეგ შეხვედრა დისკუსიის რეჟიმში გაგარძელდა.

- ’შეხვედრები უკვე ჩავატარეთ რუსთავში, მარნეულში გორში და საგარეჯოში’, - აღნიშნა ’დემოკრატიული ჩართულობის ცენტრების’ პროექტის მენეჯერმა ნინო ჟვანიამ. ცენტრებში მომავალ კვირას მსგავსი შეხვედრები თელავის, ზუგდიდის, ოზურგეთის, ბათუმისა და ქუთაისის ’დემოკრატიული ჩართულობის ცენტრებში’ გაიმართება.

16-დღიანი კამპანია გენდერული ძალადობის წინააღმდეგ 1991 წლიდან იღებს სათავეს. მისი დაარსების ინიციატორია ’ქალთა გლობალური ლიდერობის ცენტრი’. კამპანია მოიცავს 16 დღეს 25 ნოემბერსა და 10 დეკემბერს შორის. 25 ნოემბერი შერჩეულია, როგორც ქალთა მიმართ ძალადობის დაძლევის, ხოლო 10 დეკემბერი - როგორც ადამიანის უფლებათა დაცვის საერთაშორისო დღე.

[ნინო ზედგინიძე, ახალციხე]