NDI: კახა ბერიძის მუშაობას დადებითად მხოლოდ 13% აფასებს

NDI-ს ბოლო კვლევის მიხედვით, გამოკითხულთა 48% ახალციხის საკრებულოს უკვე ყოფილი თავმჯდომარის კახა ბერიძის მუშაობას საშუალოდ აფასებს. 4% უარყოფითად, 23% ამბობს, რომ მის შესახებ არ სმენია, კმაყოფილი კი მხოლოდ 13%–ია.

თუმცა, საქართველოს სხვა თვითმმართველი ქალაქების საკრებულოს თავმჯდომარეების შეფასებებს თუ შევადარებთ, აღმოჩნდება, რომ საკრებულოს თავმჯდომარის მუშაობა ახალციხეში უფრო მოსწონთ, ვიდრე სხვა ქალაქებში.

საქართველოს 10 თვითმმართველი ქალაქიდან, საკრებულოს თავმჯდომარის მუშაობის შეფასებას ყველაზე მაღალი მაჩვენებელი, 18%, ზუგდიდსა და მცხეთაში აქვს. ერთი პოზიციით უსწრებენ კახა ბერიძეს თელავისა და ოზურგეთის საკრებულოს თავმჯდომარეები. მათ მუშაობას დადებითად 14% აფასებს. 13%–იანი მაჩვენებლით, ასევე ერთი პოზიციით, ჩამორჩება ქუთაისის საკრებულოს თავმჯდომარე. 10%–ს მოსწონს მათი საკრებულოს თავმჯდომარის მუშაობა გურჯაანსა და ბათუმში. ყველაზე უკმაყოფილოები კი გორსა (მხოლოდ 8%–ს მოწონს) და თბილისში არიან (4%).

შეგახსენებთ, კახა ბერიძემ ახალციხის საკრებულოს თავმჯდომარის პოზიცია 2015 წლის 7 აგვისტოს, საკუთარი განცხადების საფუძველზე დატოვა. ერთი თვის შემდეგ, 7 სექტემბერს, მან საფინანსო–საბიუჯეტო კომისიაც დატოვა. საკრებულოში ერთწლიანი საქმიანობის შემდეგ, მან განაცხადა, რომ სამუშაოდ ჯანდაცვის სფეროში მიდის, იგი ერთ–ერთ კლინიკაში მენეჯერად გადავიდა, თუმცა, ამ დრომდე რჩება საკრებულოში დეპუტატად. ახალციხის საკრებულოში ახალი თავმჯდომარე ჯერ ისევ არ აურჩევიათ.

NDI-ს გამოკითხვა ჩატარდა 2015 წლის 8 აგვისტო-10 სექტემბრის პერიოდში. წარმომადგენლობითი შერჩევის საფუძველზე, პირისპირ ინტერვიუებით, საქართველოს მასშტაბით 4,448 მოქალაქე გამოკითხეს. კვლევაში საშუალო ცდომილების ზღვარი +/- 3.01%–ია.

NDI-ის კვლევა დაფინანსებულია შვედეთის საერთაშორისო თანამშრომლობის განვითარების სააგენტოს (Sida) მიერ.

[ნინო ნარიმანიშვილი, ახალციხე]