ვინ იქნება ახალციხის საკრებულოს თავმჯდომარეობის კანდიდატი

ახალციხის საკრებულოს თავმჯდომარეს კახა ბერიძეს, დეპუტატებმა და ქალაქის მერმა ერთწლიანი მუშაობისთვის მადლობა გადაუხადეს.

უმრავლესობაც და უმცირესობაც ბერიძის მუშაობას დადებითად აფასებს.

„დიდი მადლობა ერთწლიანი მუშაობისთვის, გული გვწყდება რომ მიდიხარ, თუმცა კვლავ რჩები ჩვენი გუნდის წევრად, იყავი გვერდში მდგომი და ჩვენი თანამებრძოლი“, – განაცხადა ახალციხის მერმა გიორგი კოპაძემ.

სხდომის დასრულების შემდეგ უმრავლესობის წევრებმა იმის შესახებ, თუ ვის დაასახელებენ საკრებულოს თავმჯდომარის კანდიდატად, საუბარი არ ისურვეს.
„ამას პრაიმერი გამოავლენს. ვისაც დააყენებს უმრავლესობა კანდიდატად მეც იმას დავუჭერ მხარს“, – განაცხადა უმრავლესობის წარმომადგენელმა დავით ლომიძემ.

კითხვაზე ხომ არ განიხილება მისი კანდიდატურა, გვიპასუხა: „არა, ამაზე საუბარი არ ყოფილა, მაგრამ თუ უმრავლესობა ერთიანი იქნება ჩემი კანდიდატურის მიმართ უარს არ ვიტყვი“.

საკრებულოს თავმჯდომარის მოვალეობის შემსრულებელი თამარ გოგოლაძე აცხადებს, რომ საკრებულოში ბევრი ღირსეული კანდიდატია: „ამ წუთში რომელიმე მათგანის დასახელებისგან თავს შევიკავებ“.

ვინ შეიძლება დაასახელონ უმრავლესობის მხრიდან თავმჯდომარის კანდიდატად ამაზე საუბარი უმცირესობის წარმომადგენელს შალვა გოგოლაძესაც უჭირს: „ჩემზე რომ იყოს დამოკიდებული საკუთარ თავს დავასახელებდი“.

ოპოზიცია, კონკრეტულად კი „ნაციონალური მოძრაობა“ კანდიდატის დაყენებას გეგმავს, თუმცა ის, თუ ვინ იქნება დასახელებული ამ ეტაპზე არ ასაჯაროებენ.

„ამ წუთში ერთი ის ვიცი ზუსტად, რომ ეს მე არ ვიქნები“, – აცხადებს „ნაციონალური მოძრაობის“ წარმომადგენელი მალხაზ გიქოშვილი.

მომავალი საკრებულოს სხდომა, როგორც ბიუროს სხდომაზე ითქვა, მომავალ კვირას გაიმართება, სწორეს იქ გახდება ცნობილი როგორც კანდიდატების ასევე არჩეული საკრებულოს თავმჯდომარის ვინაობაც.

შეგახსენებთ, დღეს, 7 აგვისტოს ახალციხის საკრებულოს თავმჯდომარემ კახა ბერიძემ თანამდებობა დატოვა, მან ამის შესახებ ბიუროს სხდომაზე განაცხადა.

[თამუნა უჩიძე, ახალციხე]