NDI: ახალციხის მერის მუშაობას გამოკითხულთა 29% დადებითად აფასებს

გამოკითხულთა 53% გიორგი კოპაძის მუშაობას, საშუალო შეფასებას აძლევს, 8% ფიქრობს, რომ ახალციხის მერი ცუდად მუშაობს, 7 %–ს კი კითხვაზე პასუხის გაცემა უჭირს.

შეკითხვაზე - როგორ შეაფასებდით თქვენი ქალაქის მერის საქმიანობას? – ყველაზე დაბალი მაჩვენებელი თბილისისა და გორის მერებს აქვთ. დავით ნარმანიას მუშაობას დადებითად მხოლოდ 12% აფასებს, ზურაბ ჯირკველიშვილის მუშაობით კი კმაყოფილი მხოლოდ 7%–ია.

ყველაზე მეტი რესპონდენტი მიიჩნევს დადებითად ახალციხის მერის გიორგი კოპაძის (29%), თელავის მერის პლატონ კალმახელიძის (25%), ოზურგეთის მერის ბეგლარ სიორიძისა (21%) და მცხეთის მერის ავთანდილ ნემსიწვერიძის (21%) საქმიანობას.

გამოკითხვა ჩატარდა 2015 წლის 8 აგვისტო-10 სექტემბრის პერიოდში.
წარმომადგენლობითი შერჩევის საფუძველზე, პირისპირ ინტერვიუებით, საქართველოს მასშტაბით 4,448 მოქალაქე გამოკითხეს.
კვლევაში საშუალო ცდომილების ზღვარი +/- 3.01%–ია.

NDI-ის კვლევა დაფინანსებულია შვედეთის საერთაშორისო თანამშრომლობის განვითარების სააგენტოს (Sida) მიერ.

[ნინო ნარიმანიშვილი, ახალციხე]