თანამშრომლებს კომპანია ”IDS ბორჯომი საქართველო” იმიჯის შებღალვაში ადანაშაულებს

”პროტესტის მესამე დღეს გაფიცულებმა შეცვალეს ტაქტიკა და მოთხოვნების პარალელურად, სამწუხაროდ, დაიწყეს ცილისმწამებლური ბრალდებების გავრცელება, რომელიც პირდაპირ მიმართულია კომპანიის იმიჯის შებღალვისკენ. კომპანია აიდიეს ბორჯომი საქართველო კიდევ ერთხელ სთხოვს გაფიცულებს მოუხმონ ჯანსაღ აზრსა და საკუთარი უსაფუძვლო, ცილისმწამებლური განცხადებებით ნუ მიაყენებენ ჩრდილს ბრენდისა და კომპანიის რეპუტაციას”, - ნათქვამია განცახდებაში.

ბორჯომის პირველი ჩამომსხმელი ქარხნის თანამშრომლები აცხადებენ, რომ ადინისტრაციის განცხადება უსაფუძვლოა. ისინი მხოლოდ და მხოლოდ ხელფასების 100-პროცენტით მომატებას და სამუშაო პირობების მოწესრიგებას ითხოვენ.

შეგახსენებთ, რომ ბორჯომის N1 ჩამომსხმელი ქარხნის მუშები 23 ოქტომბერს გაიფიცნენ. გაფიცულ მუშებსა და კომპანიას შორის გუშინ შეთანხმება ვერ შედგა, რადგან კომპანიის მენეჯმენტის მიერ შეთავაზებული 25%-იანი მატება N1 ქარხნის გაფიცული თანამშრომლებისთვის მისაღები არ აღმოჩნდა. მესამე დღეა ბორჯომის პირველ ქარხანაში ყველა საწარმო გაჩერებულია. მუშები აცხადებენ, რომ პროტესტს იქამდე გააგრძელებენ, ვიდრე მათი მოთხოვნები არ დაკმაყოფილდება. სამი დღეა ისინი პროტესტის ნიშნად ქარხანასთან იკრიბებიან.

გუშინ, გვიან საღამოს კომპანიამ პირველი ოფიციალური განცხადება გაავრცელა. ადმინისტრაცია თანამშრომლებს კეთილგონიერებისა და ციტის პასუხისმგებლობისგენ მოუწოდებდა და იმედოვნებდა, რომ ქარხანაში დაუყოვნებლივ აღდგებოდა სამუშაო პროცესი. მეორე განცხადება კი კომპანიამ დღეს საღამოს გაავრცელა. ოფიციალური განცხადებით კომპანიის ხელმძღვანელობა თანამშრომლებს ისევ მეტი პასუხისმგებლობისგენ მოუწოდებს.

[ნინო ნარიმანიშვილი, ბორჯომი]