ბორჯომში მოლაპარაკებები შედგა

პროტესტის მეოთხე დღეს გაფიცული თანამშრომლები კომპანია ”აიდიეს ბორჯომის გენერალურ დირექტორს ზაზა კიკვაძეს შეხვდნენ. მოლაპარაკებები მედიისთვის დახურულ კარს მიღმა გაიმართა.

შეხვედრიდან გამოსულმა თანამშრომლებმა მედიასთან კომენტარის გაკეთებაზე უარი განაცხადეს.

კომპანიის გენერალური დირექტორის მოადგილემ ლევან ბაღდავაძემ კი განაცახდა, რომ გაფიცული თანამშრომლები ხელფასების 25-პროცენტიან მატებას დასთანხმდნენ. მომატებულ ანაზღაურებას თანამშრომლები დეკემბრიდან მიიღებენ.

”შევხედავთ საწარმოს მუშაობას, ანაზღაურების მომატება მერეც შეიძლება. რაც შეეხება მათ მოთხოვნას ხელფასების 100-პროცენტიან მომატებაზე, ეს ვერ მოხერხდება, რადგან ასეთ შემთხვევაში საწარმო ზარალზე წავა”, - განაცხადა ბაღდავაძემ.
დღის მეორე ნახევარში მესამე ოფიციალური განცხადება გაავრცელა კომპანია ”აიდიეს ბორჯომმაც”.

”დღეს, დღის მეორე ნახევრიდან ბორჯომის N1 ქარხანაში საწარმოო პროცესი სრულად აღდგა. მოლაპარაკებების მეოთხე დღეს კომპანია აიდიეს ბორჯომი საქართელოს მენეჯმენტსა და გაფიცულ თანამშრომლებს შორის შეთანხმება შედგა, რის საფუძველზეც განახლდა ჩამოსხმისა და გადატვირთვის პროცესი”, - ნათქვამია განცხადებაში.

შეგახსენებთ, რომ ბორჯომის პირველი ჩამომსხმელი ქარხნის 250-მდე თანამშრომელი 23 ოქტომბერს გაიფიცა. კომპანია ”აიდიეს ბორჯომის” ხელმძღვანელობა, სამი დღე უშედეგოდ ცდილობდა მათთან მოლაპარაკებას. ამ დრომდე გაფიცული თანამშრომლები ხელფასების 25-პროცენტიან მატებას არ თანხმდებოდნენ.

[ნინო ნარიმანიშვილი, ბორჯომი]