კომპანია ”IDS ბორჯომი საქართველოს” განცხადება

განცახდების თანახმად, საწარმოში არსებული ანაზღაურება შრომის ბაზარზე არსებული სიტუაციის ადეკვატურია. ქარხნებში არსებობს ეგრეთწოდებული მეცამეტე ხელფასი და სხვა წახალისებებისა თუ დახმარებების პროგრამები. გარდა ამისა, წელს, მთელი წლის განმავლობაში, თანამშრომლებს უტარდებათ ტრეინინგები და გადამზადებები, რის შემდეგაც დაგეგმილია ორივე ჩამომსხმელ ქარხანაში ხელფასის საშუალოდ 25%-ით მატება.

როგორც კომპანიის პიარ-მენეჯერმა ნანიკო კუპრაშვილმა განაცხადა, კომპანიამ განცხადება გუშინ, გვიან საღამოს გაავრცელა. განვხადებაში ნათქვამია, რომ მუშაობა მხოლოდ პირველ ქარხანაშია შეჩერებული. N2 ჩამომსხმელ ქარხანაში ჩამოსხმის პროცესი გეგმის მიხედვით მიმდინარეობს. ბორჯომის N1 ჩამომსხმელი ქარხნის თანამშრომლების მოთხოვნა ზუსტად იგივეა, რაც ამ ეტაპზე საქართველოს სხვადასხვა რეგიონებში მიმდინარე გაფიცვების მონაწილეებისა - ხელფასების 100%-ით მატება.

შეგახსენებთ, რომ ბორჯომის N1 ჩამომსხმელი ქარხნის მუშები 23 ოქტომბერს გაიფიცნენ. გაფცულ მუშებსა და კომპანიას შორის გუშინ შეთანხმება ვერ შედგა, რადგან კომპანიის მენეჯმენტის მიერ შეთავაზებული 25%-იანი მატება N1 ქარხნის გაფიცული თანამშრომლებისთვის მისაღები არ აღმოჩნდა.

”კომპანია ვერ ჩაებმება პროცესში, რომელიც ზარალს მიაყენებს ბრენდს, მის იმიჯსა და რეპუტაციას, ასევე ვერ დაუშვებს „ბორჯომზე“ დეფიციტის ხელოვნურად შექმნის მცდელობებს. კომპანია აიდიეს ბორჯომი საქართველო, კიდევ ერთხელ მოუწოდებს გაფიცულ თანამშრომლებს მეტი პასუხისმგებლობისგენ და იმედოვნებს, რომ ქარხანაში დაუყოვნებლივ აღდგება სამუშაო პროცესი”, - ნათქვამია განცხადებაში.

[ნინო ნარიმანიშვილი, ბორჯომი]