ბორჯომის ქარხანაში მოლაპარაკებებზე ვერ შეთანხმდნენ

ქარხნის თანამშრომლები საწარმოსთან დღეს დილიდან ისევ შეიკრიბნენ. ქარხანაში იმყოფებოდა ”IDS ბორჯომის” გენერალური დირექტორის მოადგილე ლევან ბაღდავაძეც. მას შემდეგ, რაც ადმინისტრაციასთან შეხვედრა დაასრულა, ბაღდავაძე მუშებთან მოლაპარაკებებს გეგმავდა, თუმცა, ჟურნალისტების დასწრების გარეშე. მუშები კი შეხედრას მხოლოდ მედიის თანდასწრებით თანხმდებოდნენ. საბოლოოდ, გაფიცულ თანამშრომლებსა და ადმინისტრაციას შორის მოლაპარაკებები არ შედგა.

ამ წუთისთვის ქარხანასთან შეკრებილი მუშები დაიშალნენ. ისინი აცხადებენ, რომ გაფიცვა იქამდე გაგრძელდება, ვიდრე კომპანიის ხელმძღვანელობა მათ მოთხოვნებს არ დააკმაყოფილებს.

შეგახსენებთ, რომ ბორჯომის პირველ ჩამომსხმელ ქარხანაში მომსახურე პერსონალი გუშინ დილიდან გაიფიცა. ისინი კატეგორიულად უარყოფენ ბაღდავაძის მტკიცებას, რომ საშუალო ხელფასი, დარიცხვით, 650 ლარია და ამბობენ, რომ თანამშრომელთა ანაზღაურება 180-დან 350 ლარამდეა. გაფიცულ თანამშრომლებთან მოლაპარაკებები გუშინვე სცადა კომპანიის გენერალური დირექტორის პირველმა მოადგილემ ლევან ბაღდავაძემ. მუშებს იგი ქარხანაში არსებული მდგომარეობის გადახედვას დაჰპირდა. თუმცა, მუშები აცხადებენ, რომ სიტყვიერი დაპირებების აღარ სჯერათ და საწარმო იქამდე იქნება გაჩერებული, ვიდრე მათი მოთხოვნები არ დაკმაყოფილდება. ”IDS ბორჯომის” გენერალურ დირექტორს ქარხანაში სავარაუდოდ ხვალისთვის ელოდებიან.

[ნინო ნარიმანიშვილი, ბორჯომი]