ბორჯომში მუშების პროტესტი გრძელდება

გაფიცული თანამშრომლების მოთხოვნები უცვლელია, ისინი ხელფასების მომატებას და სამუშაო პირობების გაუმჯობესებას ითხოვენ. საწარმოს ეზოში ამ დროისთვის 250-მდე თანამშრომელია შეკრებილი.

კომპანია ”IDS ბორჯომის” პიარ-მენეჯერი ნანიკო კუპრაშვილი აცხადებს, რომ კვლავ ბორჯომში რჩება ”IDS ბორჯომის” გენერალური დირექტორის პირველი მოადგილე ლევან ბაღდავაძე, რომელიც თანამშრომლებთან მოლაპარაკებას ცდილობს.

ქარხნის ადმინისტრაცია ამ წუთებში ცდილობს გაფიცულ თანამშრომლებთან მოლაპარაკებები გამართოს. ბაღდავაძე მუშებს მედიისთვის დახურულ კარს მიღმა შეხვედრას სთავაზობს, თანამშრომლები კი შეხვედრას მხოლოდ ჟურნალისტების თანდასწრებით თანხმდებიან.

შეგახსენებთ, რომ ბორჯომის #1 ჩამომსხმელი ქარხნის 250-მდე თანამშრომელი ხელფასების მომატების მოთხოვნით გუშინ დილიდან გაიფიცა.

[ნინო ნარიმანიშვილი, ახალციხე]