ახალციხის თემმა საჯარო მოხელეთა შერჩევის წესში ცვლილებები შეიტანა

ცვლილებებზე თვითმმართველი თემის ახალციხის მუნიციპალიტეტის გამგეობაში დღეს, 9 ოქტომბერს იმსჯელეს. ცვლილების მიხედვით, ადგილობრივი თვითმმართველობის მოხელეთა შესარჩევ კონკურსზე უფროსი სპეციალისტები და წამყვანი სპეციალისტები, ასევე, გამგებლის წარმომადგენლების თანაშემწეები, 60%–იანი ბარიერის ნაცვლად, 55%–იან ბარიერს გადალახავენ.

„გამგებლის წარმომადგენელმა კონკურსის მეორე ეტაპზე უნდა გადალახოს 55%–იანი ზღვარი, მისი თანაშემწე ისევ რჩებოდა 60%–იანი ზღვარის ვალდებულებით. შესაბამისად, ამ კატეგორიის მოხელეებისთვის დგინდება 55%–იანი ზღვარი“, – განმარტავს თვითმმართველი თემის ახალციხის მუნიციპალიტეტის გამგეობის ადმინისტრაციული სამსახურის უფროსი ილია ზარდიაშვილი.

შეგასხენებთ, გამგებლის წარმომადგენლებისთვის ბარიერი იმ მოტივით დაწიეს, რომ ამ პოზიციებზე კადრების შერჩევა ჭირდა.
„კონკურსის მიმდინარეობამ გვიჩვენა, რომ სოფლებში მსგავსი კადრების მოძებნა რთულია“, – აცხადებდა მაშინ ილია ზარდიაშვილი.
ამ ცვლილებას სხდომაზე მყოფმა 19–ვე დეპუტატმა მხარი ერთხმად დაუჭირა.

დღესვე, „ახალციხის მუნიციპალიტეტის ადგილობრივი თვითმმართველობის მოხელეთა შესარჩევი კონკურსის დამატებითი საკვალიფიკაციო მოთხოვნების“ დამტკიცების შესახებ ახალციხის მუნიციპალიტეტის საკრებულოს 2015 წლის 19 თებერვლის N 13–ე დადგენილება ძალადაკარგულად გამოაცხადეს. ამიერიდან, თვითმმართველობის მოხელეთა შესარჩევი კონკურსის დამატებითი საკვალიფიკაციო მოთხოვნებს საკრებულოს ნაცვლად, გამგეობა დაადგენს.

დეპუტატებმა ამ ცვლილებასაც ერთხმად დაუჭირეს მხარი.



[თინათინ ზაზაძე, ახალციხე]