პეტროს ვართანიანს წყალთბილის ტერიტორიულ ორგანოში გამგებლის წარმომადგენლის პოსტი 10 წლის განმავლობაში ეკავა. 2014 წლის დეკემბერში ჩატარებულ საჯარო მოხელეთა კონკურსზე ტესტირების დროს ჩაიჭრა. ვართანიანი ამჟამად ამავე ტერიტორიულ ორგანოში ახალი კონკურსის გამოცხადებამდე ხელშეკრულებით ჰყავთ აყვანილი.
დაბალი ქულა მიიღო ტესტირებაზე პამაჯის ტერიტორიული ორგანოს ყოფილმა რწმუნებულმა კარლენ კარახანიანმაც.
„21 ქულა ავიღე. რთული იყო ძალიან. გამოცდაზე ისე გავედი, რომ არ ვიცოდი, როგორი ტესტები იყო. ახლა ბარიერი დაწიეს და იმედი მაქვს, რომ ჩავაბარებ. 16 წელია ვმუშაობ და ჩემს საკრებულოში ყველაფერი წესრგიში მაქვს“, – ამბობს იგი.
ახალციხის მუნიციპალიტეტში 45 სოფელი და ერთი ქალაქია. 15 ადმინისტრაციულ ერთეულში საჯარო მოხელეთა შესარჩევი კონკურსი წარმატებით, მხოლოდ შვიდმა კონკურსანტმა გაიარა.
განსაკუთრებით, ტესტირების გავლა სომხური სოფლების ტერიტორიული ორგანოს რწმუნებულებს გაუჭირდათ. ოთხი ტერიტორიული ორგანოდან რწმუნებული, მხოლოდ სხვილისის ტერიტორიულ ორგანოშია, მან კონურსი წარმატებით გაიარა. დანარჩენ 8 ტერიტორიულ ორგანოში კი გამგებლის წარმომადგენლები ხელშეკრულებით აიყვანეს. თანამშრომლებს ვადა აპრილის ბოლომდე აქვთ.
ახალციხის მუნიციპალიტეტის თვითმმართველობაში დასასაქმებლად კონკურსანტებს 60–პროცენტიანი ბარიერი უნდა გადაელახათ. იმის გამო, რომ კონკურსანტებს, განსაკუთრებით კი რწმუნებულებს ბარიერის გადალახვა გაუჭირდათ, ზედა ზღვარი ხუთი პროცენტით დაწიეს.
„ერთიანი ნაციონალური მოძრაობის“ ფრაქციის თავმჯდომარის მაკა სუდაძის განცხადებით, ფრაქციის წევრებმა მაღალი ბარიერი თავიდანვე გააპროტესტეს: „ვუთხარით, რომ უხერხული ვითარება შეიქმნებოდა, მაგრამ არ დაგვიჯერეს. 90–მა პროცენტმა ბარიერი ვერ გადალახა. ეს უფრო რთული აღმოჩნდა სომეხი ეროვნების კონკურსანტებისთვის. ზუსტად ამიტომ დაიწია ბარიერი, რომ მათ გაუჭირდათ საჭირო რაოდენობის ქულების დაგროვება“, – ამბობს მაკა სუდაძე.
მისივე თქმით არასწორია, როდესაც კონკურსანტებს არათანაბარ პირობებში აყენებ: „ყველასთვის ერთნაირად უნდა იყოს. არ უნდა იყოს ერთი პოზიციისთვის მაღალი, მეორესთვის კი დაბალი. გამგეობაში და საკრებულოში იმიტომ ვზივართ, რომ ეს თავიდანვე გაგვეთვალისწინებინა“.
არ ეთანხმებიან, სუდაძეს ახალციხის მუნიციპალიტეტის გამგეობის ადმინისტრაციაში და აცხადებენ, რომ პირობები ყველასთვის თანაბარი იყო.
„ვერ ვიტყვი, რომ მარტო სომხურ სოფლებში გაუჭირდათ ჩაბარება, მათთვის ტესტები ორენოვანი იყო. უბრალოდ, კონკურსის მიმდინარეობამ გვიჩვენა, რომ სოფლებში მსგავსი კადრების მოძებნა რთულია და ბარიერი ამიტომ დავწიეთ. რწმუნებულებისთვის 33 ქულა გამსვლელი იქნება“, – ამბობს ახალციხის მუნიციპალიტეტის გამგეობის ადმინისტრაციული სამსახურის უფროსი ილია ზარდიაშვილი.
მისი განცხადებით, კონკურსის მეორე ეტაპი სავარაუდოდ აპრილშია დაგეგმილი: „გამოცდების ეროვნულმა ცენტრმა შემოგვთავაზა, რომ ტესტირება 18 აპრილს ჩავატაროთ, ჩვენ კი გვინდა რომ ეს თარიღი ცოტა წინ გადმოვწიოთ“.
ახალციხის მუნიციპალიტეტის გამგეობამ საჯარო მოხელეთა შესარჩევი კონკურსი 25 თებერვალს 29 ვაკანსიაზე გამოაცხადა, საკრებულომ კი ორზე.
[თინათინ ზაზაძე, ახალციხე]