ახალციხის გამგეობაში საჯარო მოხელეთა შესარჩევი კონკურსი დასრულდა

ახალციხის მუნიციპალიტეტის გამგეობაში საკონკურსო – საატესტაციო კომისიამ თანამშრომლების შერჩევა დაასრულა, თუმცა, ჯერ შემაჯამებელი ოქმი არ დაწერილა. საბოლოო გადაწყვეტილების მიღებიდან ხუთ დღეში გაირკვევა თუ ვინ დასაქმდება ახალციხის გამგეობაში სხვადასხვა პოზიციებზე.

როგორც გამგეობაში აცხადებენ, კონკურსის მესამე ეტაპი სულ 75 აპლიკანტს უნდა გაევლო, თუმცა გასაუბრებაზე მხოლოდ 58 კონკურსანტი გამოცხადდა.

შეგახსენებთ, რომ ახალციხის თვითმმართველობაში საჯარო მოხელეთა შესარჩევი კონკურსი მიმდინარე წლის 25 თებერვალს დაიწყო. გამგეობამ ვაკანსია 29 ადგილზე გამოაცხადა, საკრებულომ კი 2–ზე. საბუთების მიღება 6 მარტს დასრულდა.

გამგეობაში ყველაზე მოთხოვნადი აღმოჩნდა საქმისწარმოებისა და საარქივო დოკუმენტაციის დამუშავების საკითხებში წამყვანი სპეციალისტის პოზიცია. ამ ვაკანსიაზე 59 განაცხადი შევიდა. 42 განაცხადი შევიდა გამგებლის მდივნის ადგილზე, 37 კი საორგანიზაციო საკითხებში წამყვანი სპეციალისტის პოზიციაზე.

საკრებულოში შესული 83 განაცხადიდან, 37 საორგანიზაციო საკითხებში მთავარი სპეცილისტის პოზიციაზე იყო, 46 კი საორგანიზაციო საკითხებში წამყვანი სპეციალისტის ვაკანსიაზე.

ახალციხის გამგეობაში ტესტირება 18 და 19 აპრილს ჩატარდა. ტესტირება ახალციხის პირველ და მეხუთე საჯარო სკოლებში მიმდინაროებდა, რომელსაც გამოცდების ეროვნული ცენტრის წარმომადგენლები აკვირდებოდნენ.

ახალციხის გამგეობაში ტესტირებაზე 205 კონკურსანტიდან 117 აპლიკანტი გამოცხადდა, აქედან 36 ქულაზე მეტი მხოლოდ 40 – მა კონკურსანტმა აიღო. ამ კონკურსანტებს დაემატათ ის აპლიკანტებიც, რომლებმაც წინა ტესტირებაზე გამსვლელი ქულა აიღეს, თუმცა გასაუბრება ვერ გაიარეს. მათ წარმოადგინეს შესაბამისი ცნობა და გასაუბრება ტესტირების გარეშე გაიარეს.

კონკურსის მესამე ეტაპი 30 აპრილს დაიწყო. საკონკურსო – საატესტაციო კომისია, კონკურსანტებს კითხვებს ძირითადად საკანონმდებლო დებულებებიდან უსვამდა. თითოეული მათგანი აპლიკანტების პასუხებს ინდივიდუალურად, 10 ბალიანი სისტემით აფასებდა.

საკონკურო – საატესტაციო კომისიას ახალციხის მუნიციპალიტეტის გამგებელი ზაზა მელიქიძე ხელმძღვანელობს, წევრები არიან გამგებლის მოადგილე გურამ მელიქიძე, ახალციხის მუნიციპალიტეტის საკრებულოს თავმჯდომარე დავით ლომიძე, გამგეობის ადმინისტრაციის სამსახურის უფროსი ილია ზარდიაშვილი, ახალციხის მუნიციპალიტეტის საკრებულოს იურიდიულ საკითხთა კომისიის თავმჯდომარე თამარ გოგინაშვილი, გამგეობის იურიდიული სამსახურის უფროსი ბაია იველაშვილი და სამხარეო ადმინისტრაციის მთავარი სპეციალისტი ნინო ნემსაძე.

[მანანა სარაშვილი, ახალციხე]