რა შედეგით დასრულდა საჯარო მოხელეთა შესარჩევი კონკურსები

მერიაში და გამგეობაში კონკურსის ბოლო ეტაპამდე, გასაუბრებამდე, თანაბარი რაოდენობის კონკურსანტებმა მიაღწიეს, 114–მა მერიაში და 112–მა გამგეობაში. შედეგები მერიაში უკეთესი აღმოჩნდა, ვიდრე გამგეობაში, თუმცა, გამგეობაში კონკურს ვერ გავლილი 15 თანამშრომლიდან, 11 სოფლებში გამგებლის წარმომადგენელი იყო. გამგებლის წარმომადგენლებს კი კონკურსის გავლა ადიგენის მუნიციპალიტეტის გამგეობაშიც გაუჭირდათ.

ახალციხის მერიაში საჯარო მოხელეთა შესარჩევი კონკურსის მესამე ეტაპზე, გასაუბრებაზე, 114–დან 108 კონკურსანტი გამოცხადდა. ამათგან, გასაუბრება 63–მა ვერ გაიარა, ერთ–ერთი ბიუჯეტის დაგეგმვის საკითხებში მერიის მთავარი სპეციალისტი იყო.

მერიის ადმინისტრაციის სამსახურის უფროსი ნინო მიქაბერიძე ამბობს, რომ აღნიშნულ პოზიციაზე ახალი თანამშრომელი უკვე შერჩეულია: „19 იანვრამდე აქვს საბუთების წარდგენის ვადა, როგორც კი დოკუმენტებს მოიტანს, დაინიშნება აღნიშნულ პოზიციაზე“.

საჯარო მოხელეთა შესარჩევი კონკურსი 112–დან 54–მა ვერ გაიარა ახალციხის მუნიციპალიტეტის გამგეობაში. ამათგან, 15 მოქმედი თანამშრომელი იყო. 15–დან 11 ტესტირებაზე ჩაიჭრა, 4 კი გასაუბრებაზე. კონკურს ვერ გავლილი თანამშრომლებიდან, სამი გამგეობის ადმინისტრაციის სამსახურის თანამშრომელი იყო, ერთი საკრებულოს აპარატის, დანარჩენები კი სოფლებში გამგებელის წარმომადგენლები იყვნენ.

„აღნიშნულ პოზიციებზე კონკურსი თავიდან გამოცხადდება. გარდა ამისა, კონკურსს კიდევ 24 პოზიციაზე გამოვაცხადებთ, რომელიც შევსებული არ იყო“, – ამბობს ახალციხის მუნიციპალიტეტის გამგეობის ადმინისტრაციის სამსახურის უფროსი ილია ზარდიაშვილი.

ახალციხის მერიაში საჯარო მოხელეთა შესარჩევი კონკურსი 48 პოზიციაზე იყო გამოცხადებული, გამგეობაში კი 70–ზე. მერიაში არსებული 48 ვაკანსიიდან, 4 ქალაქის საკრებულოში იყო, 44 კი მერიაში. გამგეობაში – 65, საკრებულოში 5 ვაკანსია იყო.
ქალაქის მერიაში არსებულ 48 ვაკანსიაზე 757 განცხადება შევიდა. თითოეულ განმცხადებელს საბუთების წარდგენა რამდენიმე ვაკანსიაზე შეეძლო. ასევე რამდენიმე ვაკანსიაზე შეეძლოთ საბუთების შეტანა ახალციხის მუნიციპალიტეტის გამგეობაში. აქ 70 ვაკანსიაზე 894 განაცხადი შევიდა.

საჯარო მოხელეთა შესარჩევი კონკურსების პირველი ეტაპი საბუთების გადარჩევა იყო. მერიაში მეორე ეტაპზე 257 კონკურსანტი გადავიდა, გამგეობაში 284. მეორე ეტაპზე, ტესტირებაზე, მერიაში 257–დან 164 გამოცხადდა და წარმატებით 114–მა ჩააბარა. გამგეობაში კი ტესტირებაზე 284 აპლიკანტიდან 220 გამოცხადდა და აქედან კომპეტენციის ზღვარი 112 – მა გადალახა.

საბოლოოდ, მერიაში 45 თანამშრომელი შეარჩიეს, 41 მერიაში და 4 საკრებულოში, 3 ადგილი ვაკანტურია.

გამგეობაში კი 46 თანამშრომელი შეარჩიეს, 43 გამგეობაში, სამი საკრებულოში. გამგეობაში ვაკანტური 24 ადგილია. როდის გამოცხადდება კონკურსები ამ ეტაპზე ცნობილი არაა.

[მანანა სარაშვილი, ახალციხე]