ახალციხის გამგეობაში ჩატარებული კონკურსის შედეგები გასაჯაროვდა

ადგილობრივ თვითმმართველობაში მიმდინარე საჯარო მოხელეთა შესარჩევი კონკურის შედეგები დღეს, 15 თებერვალს გახდა ცნობილი. იმ 58 კონკურსანტიდან, რომლებიც კონკურსის მესამე ეტაპამდე მივიდნენ, საკონკურსო კომისიამ 14 კანდიდატი მოიწონა. შესაბამისად, 14 პოზიციაზე გამგეობას უკვე ჰყავს ახალი თანამშრომელი.

ეს პოზიციებია:
საზოგადოებასთან ურთიერთობის სამსახურის სპეციალისტი;
გამგებლის წარმომადგენლის თანაშემწე ვალის ადმინისტრაციულ ერთეულში;
სპეციალისტი საორგანიზაციო საკითხებში;
გამგებლის პირადი მდივანი;
წამყვანი სპეციალისტი ინფრასტრუქტურის და მშენებლობის საკითხებში;
უფროსი სპეციალისტი არქიტექტურისა და სივრცითი მოწყობის საკითხებში;
მთავარი სპეციალისტი კონტროლისა და აუდიტის საკითხებში;
წამყვანი სპეციალისტი ზედამხედველობის საკითხებში;
გამგებლის წარმომადგენელი აწყურის ადმინისტრაციულ ერთეულში,
გამგებლის წარმომადგენლის თანაშემწე სხვილისის ადმინისტრაციულ ერთეულში;
წამყვანი სპეციალისტი სამეურნეო საკითხებში;
ვალის წარმომადგენლის თანაშემწე;
წამყვანი სპეციალისტი შესყიდვების საკითხებში;
იურიდიული ანალიზის განყოფილების უფროსი;

ახალციხის მუნიციპალიტეტის გამგეობის ადმინისტრაციული სამსახურის უფროსის ილია ზარდიაშვილის ინფორმაციით, შერჩეულ კადრებს საჭირო დოკუმენტების შესაგროვებლად შეტყობინებები უკვე გადაეგზავნათ.

„დოკუმენტების მოტანის შემდეგ დაიწერება მათი დანიშვნის ბრძანებები“, – ამბობს ილია ზარდიაშვილი.

გამგეობაში ეს კონკურსის მეოთხე მცდელობა იყო და ამ მცდელობის შემდეგ ისევ დარჩა ვაკანტური ადგილები. ამჯერად, გამგეობას ახალი თანამშრომლების შესარჩევად კონკურსის მეხუთედ გამოცხადება მოუწევს, დასაკომპლექტებელი 14 ადგილია.

შეგახსენებთ, რომ ახალციხის მუნციპალიტეტის გამგეობაში საჯარო მოხელეთა შესარჩევ კონკურსზე, საბუთების მიღება 2015 წლის 27 ნოემბერს დასრულდა. 28 ვაკანტური ადგილისთვის 567 განაცხადი შევიდა. საკონკურსო–საატესტაციო კომისიამ საბუთების გადარჩევას დაახლოებით ერთი თვე მოანდომა. კონკურსის მეორე ეტაპი ტესტირება, 23–24 იანვარს ჩატარდა. 175 კონკურსანტიდან გამოცდაზე 55 არ გამოცხადდა.
ტესტირების შედეგები არავის გაუსაჩივრებია.

კონკურსის მესამე ეტაპი–გასაუბრება 8–9 თებერვალს მიმდინარეობდა. 58 კონკურსანტიდან გასაუბრებაზე 17 განმცხადებელი არ მივიდა. დარჩენილი 41 კადრიდან კი გამგეობამ 14 კადრი შეარჩია.

[თინათინ ზაზაძე, ახალციხე]