ახალციხის მუნიციპალიტეტის გამგეობაში კონკურსი 15-მა თანამშრომელმა ვერ გაიარა

ამ 15–დან სამი გამგეობის ადმინისტრაციის სამსახურის თანამშრომელი იყო, ერთი საკრებულოს აპარატის, დანარჩენები კი სოფლებში გამგებელის წარმომადგენლები იყვნენ.

„აღნიშნულ პოზიციებზე კონკურსი თავიდან გამოცხადდება. გარდა ამისა, კონკურსს კიდევ 24 პოზიციაზე გამოვაცხადებთ, რომელიც შევსებული არ იყო“, – ამბობს ახალციხის მუნიციპალიტეტის გამგეობის ადმინისტრაციის სამსახურის უფროსი ილია ზარდიაშვილი.

შეგახსენებთ, რომ თვითმმართველი თემის ახალციხის მუნიციპალიტეტის გამგეობაში კონკურსი 70 ვაკანსიაზე გამოცხადდა, აქედან 65 გამგეობაში იყო, 5 კი საკრებულოში. 70 ადგილზე 894 განაცხადი შევიდა. პირველ ეტაპზე განაცხადები გადაარჩიეს.

კონკურსის მეორე ეტაპი, ტესტირება, 13 და 14 დეკემბერს გაიმართა. ტესტირებაზე 284 აპლიკანტიდან 220 გამოცხადდა, აქედან კომპეტენციის ზღვარი 112 – მა გადალახა.

112 კონკურსანტიდან გასაუბრებაზე 12 არ გამოცხადდა, 100 აპლიკანტიდან კი საკონკურსო – საატესტაციო კომისიამ 46 შეარჩია, აქედან 43 გამგეობაში, ხოლო სამი საკრებულოში დასაქმდა.

[მანანა სარაშვილი, ახალციხე]