ახალციხეში სასმელი წყლის დაზიანებული მილი ხანძთელის ქუჩას ტბორავს

გრიგოლ ხანძთელის ქუჩაზე წყლის მილი გუშინ, 24 სექტემბერს დაზიანდა. წყლის დიდმა ნაკადმა დააზიანა ასფალტიც. გახეთქილი მილიდან წყალი მთელ ქუჩაზე მიედინება.

დაზიანებული მილის გამო წყალი არ ადის N34–ში მდებარე ხუთსართულინი კორპუსის მეორე სართულამდე.

მილის დაზიანების შესახებ წყალმომარაგების კომპანიის ახალციხის სერვისცენტრს, მოსახლეობამ გუშინვე შატყობინა.

აღნიშნულ ტერიტორიაზე წყლის მილის დაზიანების ეს პირველი შემთხვევა არ არის. დაახლოებით 15 მეტრიან მონაკვეთზე, ბოლო რამდენიმე თვის განმავლობაში მილი არაერთხელ დაზიანდა.

ხანძთელის ქუჩაზე სარეაბილიტაციო სამუშაოები დღეს, 25 სექტემბერს, შუადღეს დაიწყეს.

სერვისცენტრის ხელმძღვანელის გია დალალიშვილის განმარტებით აღნიშნულ ტერიტრიაზე საბოლოოდ პრობლემა მას შემდეგ მოგვარდება, რაც ძველი ხაზები ჩაიჭრება და ახალ სისტემაზე გადაერთვება.

წყალმომარაგების კომპანიის საზოგადოებასთან ურთიერთობის სამსახურში კი აცხადებენ, ახალ სისტემაზე ქსელს მას შემდეგ გადართავენ, რაც გამრიცხველიანება დასრულდება, გამრიცხველიანებას კი მომავალი კვირიდან დაიწყებენ.

წყალმომარაგების კომპანიის თანამშრომლების მიერ სარეაბილიტაციო სამუშაოების შესრულების დროს ასფალტის საფარი ზიანდება, თუმცა, მისი აღდგება აღარ ხდება. როგორც წყალმომარაგების კომპანიაში განმარტავენ, ასფალტის დასაგებად კომპანიას ხელშეკრულება შპს „მესხეთი ავტოგზასთან“ აქვს გაფრომებული და ის დაზიანებულ მონაკვეთებს პერიოდულად აღადგენს.



[თინათინ ზაზაძე, ახალციხე]