ახალციხეში რუსთაველის ქუჩას სასმელი წყალი არ მიეწოდება

წყლის მიწოდება გუშინ, 11 ნოემბერს, დილით შეწყდა. „საქართველოს გაერთიანებული წყალმომარაგების კომპანიის“ ახალციხის სერვისცენტრის მენეჯერი გია დალალიშვილი ამბობს, რომ რუსთაველის ქუჩაზე მდებარე საერთო საცხოვრებელის მიმდებარე ტერიტორიაზე სასმელი წყლის ძველი მილი დაზიანდა: „ახლა უნდა მოვნახოთ დაერთების ადგილი, რომ ის ძველი მილი გავაუქმოთ და მის ადგილზე ახალი ჩავსვათ“.

ახალციხის წყალმომარაგების კომპანიის თანამშრომლებმა წყლის სისტემის აღდგენითი სამუშაოები გუშინ საღამოს დაიწყეს.

„გვიანობამდე ვეღარ ვიმუშავეთ, რადგან იმ ადგილზე, სადაც დაზიანებული მილია, ცენტრალური მილიც გადის და შეიძლება მუშაობის პროცესში ცენტრალური მილი დაზიანებულიყო. ამიტომ რუსთაველის ქუჩის მოსახლეობას სასმელი წყლის მიწოდება შევუწყვიტეთ, რომ წყალი ზემოთ არ ამოსულიყო და გზა არ მოეყინა“, – ამბობს დალალიშვილი.

წყალმომარაგების კომპანიის თანამშრომლებმა სასმელი წყლის აღდგენითი სამუშაოები დღეს დილით განაახლეს, როგორც გია დალალიშვილი ამბობს, დაზიანებული მილის ახალი მილით ჩანაცვლების შემდეგ რუსთაველის ქუჩაზე სასმელი წყლის მიწოდება აღდგება.

[მანანა სარაშვილი, ახალციხე]