რატომ ეშინიათ დაზიანებული წყლის მილის ხაშურის ქუჩაზე მცხოვრებლებს?

გარდა იმისა, რომ დაზიანების მახლობლად გავლა შეუძლებელია, ორივე დასახლების მცხოვრებლები ჩივიან, რომ იქვე ელექტროენერგიის სადენები გადის, რაც მოსახლეობისთვის საფრთხეს წარმოადგენს.

'ბავშვები მიდიან თამაშობენ, თუ მალე არ გაკეთდა შეიძლება რამე უბედურება მოხდეს’, - ამბობს ვარძიის ქუჩაზე მცხოვრები ლამზირა ლომიძე.

ადგილობრივები ამბობენ, რომ ადგილის დასათვალიერებლად გაერთიანებული წყალმომარაგების კომპანიის წარმომადგენლები რამდენჯერმე მივიდნენ, თუმცა, ამ დრომდე არაფერი გაუკეთებიათ.

”მოვლენ წყლის კომპანიიდან, დახედავენ გაფუჭებულ მილს და მიდიან, ასე რამდენჯერმე მოხდა”, - ამბობს ლომიძე.



საქართველოს გაერთიანებული წყალმომარაგების კომპანიის ახალციხის სერვისცენტრში ამბობენ, რომ სარეაბილიტაციო სამუშაოების შესასრულებლად კომპანია ‘შინაშხარის’ წარმომადგენლებს ელოდებიან.

‘იქ გადის წყლის ახალი მილი, რომელიც ‘შინაშხარმა’ გაიყვანა, არ გვინდა, რომ დაზიანდეს და კომპანიის წარმომადგენლებს ველოდებით. ისინიც უნდა დაესწრონ პროცესს, რომ პასუხისმგებლობა აიღონ’, - ამბობს ახალციხის სერვისცენტრის მენეჯერი გიორგი დალალიშვილი და იქვე ამატებს, რომ გამორციხული არაა სამუშაო დღესვე დაიწყოს, - ‘ბევრი რამ არის გასაკეთებელი, დაზიანებული წყლის მილი უნდა გაუქმდეს და ახალგაყვანილი მილით მიეწოდოს ხაშურის ქუჩასაც წყალი. ამიტომ აუცილებელია კომპანიის წარმომადგენლების დასწრება’.

[ნუკა სტეფნაძე ახალციხე]