ხანძთელის ქუჩაზე ამოსული წყალი ადგილობრივის სარდაფს ტბორავს

გრიგოლ ხანძთელის ქუჩაზე სასმელი წყალი დილის საათებში, მაშინ ამოდის როდესაც მოსახლეობას წყალი მიეწოდება.

ამ დროს ნიაღვარი ერთ–ერთი ადგილობრივის მიხეილ კარაპეტიანის სარდაფშიც ჩადის: „ორ დღეზე მეტია წყალი ამოდის, არვიცი რა არის გაფუჭებული, სარდაფშიც ჩამივიდა, წყლის კომპანიას კი მივმართე, მაგრამ ორი დღე ველოდე და არ გამოჩენილან“.

საქართველოს წყალმომარაგების კომპანიაში აცხადებენ, რომ გრიგოლ ხანძთელის ქუჩიდან შეტყობინება არ შესულა, თუმცა კომპანიის თანამშრომლები ადგილზე უკვე გასულები არიან და მუშაობენ.

„ამ მოქალაქის პირად ქსელზეა პრობლემები, რის გამოც წყალი გადმოვიდა“, -ამბობს გაერთიანებული წყალმომარაგების კომპანიის საზოგადოებასთან ურთიერთობის სამსახურის წარმომადგენელი ნინო რამიშვილი.

მისივე თქმით, კომპანიის წარმომადგენლები გრიგოლ ხანძთელის ქუჩაზე ქსელის აღდგენის სამუშაოებს დღის ბოლომდე დაასრულებენ.

[ლუბა გიორგაძე, ახალციხე]