ახალციხის მუნიციპალიტეტის 7 სოფელს ელექტროენერგია შეზღუდვით მიეწოდება

ახალციხის მუნიციპალიტეტის სოფლებს: აწყურს, ტყემლანას, თისელს, წინუბანს, გურკელს, აგარას, საყუნეთსა და ზიკილიას ელექტროენერგია მხოლოდ ღამის საათებში მიეწოდება.

"ენერგო–პრო ჯორჯიას" სამხრეთ საქართველოს ფილიალის საზოგადოებასთან ურთიერთობის სამსახურის სპეციალისტის გიორგი ბალახაშვილის განმარტებით, მაღალი ძაბვის ხაზების განყოფილების თანამშრომლები 110 კვ–იან ხაზზე სარემონტო სამუშაოებს აწარმოებენ.

„ზამთრის სეზონისთვის მზადება მიმდინარეობს. ხაზზე არის დაზიანებული მონაკვეთები, რომლებმაც მომავალში, ძლიერი ქარის, წვიმის ან თოვლის შემთხვევაში შესაძლოა ავარიული გამორთვა გამოიწვიოს, ამიტომ დაზიანებული მონაკვეთების ამოჭრა და გამაგრება მიმდინარეობს“, – ამბობს გიორგი ბალახაშვილი.

მისი თქმით, აღნიშნული სამუშაოების შესახებ მოსახლეობა რამდენიმე დღის წინ გააფრთხილეს.

ელექტროენერგიის მიწოდება აღნიშნულ სოფლებს სრულად ხვალ, 25 სექტემბერს აღუდგება.

[თინათინ ზაზაძე, ახალციხე]