სამცხე–ჯავახეთში 2 000–მდე აბონენტს ელექტროენერგია არ მიეწოდება

12, ნოემბერს მთელი ღამის განმავლობაში საქართველოს უმეტეს რეგიონებში ძლიერი ქარი და წვიმა იყო, მაღალ მთიან რაიონებში კი ძლიერად თოვდა, რის გამოც დაზიანდა როგორც მაღალი ძაბვის, ისე დაბალი ძაბვის გადამცემი ხაზები. აუმინდობამ პრობლემები შეუქმნა სამცხე–ჯავახეთის მოსახლეობასაც. ამ დროისთვის დაახლოებით 2 000–მდე აბონენტს ელექტროენერგია არ მიეწოდება.

"ენერგო–პრო ჯორჯიას" სამხრეთ საქართველოს ფილიალში განმარტავენ, რომ ძლიერი ქარის გამო პერიოდულად ითიშება ფიდერები. ამ დროისთვის, სამხრეთ საქართველოს ფილიალში შემავალ მუნიციპალიტეტებში ელექტროენერგია 21 000 აბონენტებს არ მიეწოდება. კომპანიის თანამშრომლები საგანგებო რეჟიმში მუშაობენ.

"ამ დროისთვის სამცხე–ჯავახეთში 100–მდე ფიდერია გამორთული, რომლებიც პერიოდულად ირთვება. ყველგან გვყავს ჩვენი ბრიგადები გაგზავნილი და პრობლემის მოსაგვარებლად მუშაობენ", – ამბობს "ენერგო–პრო ჯორჯიას" სამხრეთ საქართველოს ფილიალის საზოგადოებასთან ურთიერთობის სამსახურის წარმომადგენელი გიორგი ბალახაშვილი.

შექმნილი ვითარების გამო დროებით გადაიდო გეგმიური სამუშაოების შესრულება, რის გამოც 12 ნოემბერს ახალციხესა და მიმდებარე სოფლებში ელექტროენერგია უნდა გათიშულიყო.

როდის ჩატარდება ქვესადგურ "ახალციხეს" გეგმიური სარემონტო სამუშაოები "ენერგო–პრო ჯორჯიას" სამხრეთ საქართველოს ფილიალში ჯერ არ იციან.

[თამარ თოთაძე, ახალციხე]