ხანძარმა მოხეში შვიდსულიანი ოჯახი ღია ცის ქვეშ დატოვა [Video]

ხანძარმა გაანადგურა 27 სული მსხვილფეხა რქოსანი პირუტყვი, შინაური ფრინველი, მომარაგებული მოსავალი და სამეურნეო ტექნიკა. ოჯახის წევრები დაწვას მეზობლის წყალობით გადაურჩნენ.

ცეცხლი მეზობლებმა გვიან ღამით, 01:30 საათზე შენიშნეს. მათ გააღვიძეს მძინარე შავაძეები და გამოიძახეს სახანძრო სამსახური. მეხანძრეები ხანძარს ექვსი საათის განმავლობაში აქრობდნენ. ადგილზე დილამდე იმყოფებოდა სასწრაფო სამედიცინო დახმარების ბრიგადა და პოლიცია.



ზედაპირული გაანგარიშებით, შავაძეების ზარალი 100.000 ლარს აღწევს. ოჯახს ამ ეტაპზე არსად წასასვლელი არ აქვს. ადიგენის ადგილობრივ ხელისუფლებაში ამბობენ, რომ საშენი მასალებით დაეხმარებიან. რამდენად ეყოფა მხოლოდ საშენი მასალა უსახსროდ დარჩენილ ოჯახს და მოასწრებენ თუ არა ზამთრამდე დარჩენილ 2 თვეში სახლის აშენებას, ძნელი სათქმელია. ღია ცის ქვეშ დარჩენილი შავაძეები თავს დროებით მეზობელთან შეაფარებენ. უსახლკაროდ დარჩენილ ხუთშვილიან ოჯახს, დღეს დილით საკვებიც და ტანსაცმელიც მეზობლებმა მისცეს.

[თინათინ ზაზაძე, ოთარ აწყურელი, ადიგენი]