ხანძარი იმერთუბანში – ხუთსულიანი ოჯახი უსახლკაროდ დარჩა [Photo\Video]

სოფელ იმერთუბანში ხანძარი დაახლოებით 16:00 საათზე გაჩნდა. როგორც ადგილობრივები ყვებიან, ამ დროს სახლში ოჯახის წევრები არ იმყოფებოდნენ. მეზობლებმა ხანძრი მას შემდეგ შენიშნეს, როდესაც ცეცხლი სახურავს მოედო.

„სახურავის ტკაცუნის ხმა გავიგეთ, მეუღლემ მითხრა, რომანის სახლიდან მოდის ხმაო, გამოვიქეცით და მეზობლები უკვე შეკრებილი იყვნენ“, – ამბობს ფორჩხიძეების მეზობელი სოფიო სირბილაძე.



მეზობელი ირწმუნება, რომ სახანძრო–სამაშველო სამსახურის ჯგუფებმა დაიგვიანეს, რის გამოც სახლის გადარჩენა ვერ მოხერხდა: „მეზობელმა თქვა კვამლი დავინახე თუ არა, მაშინვე დავრეკე 112–შიო, ერთი საათი დააგვიანეს, ამასობაში სახურავი მთლიანად დაიწვა“.

სახანძრო–სამაშველო სამსახურის თანამშრომლები ოფიციალურ კომენტარს არ აკეთებენ, თუმცა, პირად საუბარში დაგვიანების ფაქტს კატეგორიულად გამორიცხავენ და ამბობენ, რომ ცეცხლი შენიშნეს და შემთხვევის ადგილზე იქამდე მივიდნენ, ვიდრე შეტყობინება შევიდოდა.



სახლში გაჩენილი ხანძრის შესახებ ფორჩხიძეებს მეზობლებმა შეატყობინეს. მცდელობის მიუხედავად, დაზარალებულებმა ალმოდებული სახლიდან ვერაფრის გამოტანა ვერ შეძლეს.

„მთაში მივდიოდით, ნახევარი საათის გასული ვიყავი, რომ დამირეკეს, შენს სახლს ცეცხლი უკიდიაო და მოვბრუნდით. დილით წყლის გამათბობელით დაიბანა ჩემმა მეუღლემ, მაგას ვუკავშირებთ, ამ დროს შუქიც ჩაქრა, რომ მოვიდა, მაშინ გაჩნდა ალბათ“, – ამბობს ოჯახის დიასახლისი ირმა მაზაშვილი.

„ოჯახი მთლიანად განადგურდა, ყველაფერი დაიწვა რამდენიმე ნივთის და კომპოტების გამოტანა შევძელით“, – აცხადებენ ადგილობრივები.
ადიგენის და ახალციხის სახანძრო–სამაშველო ბრიგადები ცეცხლის ჩასაქრობას დაახლოებით ორი საათის განმავლობაში ცდილობდნენ. შემთხვევის ადგილზე იმყოფებოდა სასწრაფო–სამედიცინო დახმარების ბრიგადა, ადგილზე იყვნენ სამართალდამცველები და ადიგენის მუნიციპალიტეტის გამგეობის თანამშრომლები.



რა ბედი ელის ფორჩხიძეების ოჯახს, ამ ეტაპზე უცნობია. ადიგენის მუნიციპალიტეტის გამგებლის მოადგილის არსენ ბალახაშვილის განმარტებით, ადგილობრივი თვითმმართველობა დაზარალებულ ოჯახს სამშენებლო მასალით დაეხმარება, რაც შეეხება ალტერნატიულ ფართს, სადაც ღია ცისქვეშ დარჩენილ ოჯახს დროებით შეიყვანენ, ამის საშუალება მუნიციპალიტეტს არ აქვს.

„მუნიციპალიტეტი შუამდგომლობას გუბერნიაში გაუწევს ხე–მასალასთან დაკავშირებით, რომელიც მშენებლობისთვის დასჭირდება, სამშენებლო მასალებზე მუნიციპალიტეტი იმსჯელებს“, – განაცხადა არსენ ბალახაშვილმა.

მისივე თქმით, დაზარალებული ოჯახი დროებით ამავე სოფელში ერთ–ერთი ადგილობრივის ოჯახს შეაფარებს თავს.





















[თინათინ ზაზაძე, გიორგი ლოდარიძე, ადიგენი]