მეოთხე დღეა მახათაძეების ეზოში სახლის გაშავებული კედლებიდან კვამლი ადის. საოჯახო ნივთების ნარჩენები, საბნები და ლეიბები, ნივთები, ჯერ ისევ იწვის. მახათაძეების ორსართულიანი, კეთილმოწყობილი სახლიდან მხოლოდ ის ტანსაცმელი გადარჩა, რაც ოჯახის წევრებს ეცვათ.
თისელში ხანძარი 8 დეკემბერს, შუადღეს გაჩნდა. ამ დროს სახლში არავინ იმყოფებოდა.
„სამის ხუთი წუთი იყო, მეძინებოდა, ვიფიქრე არ დამეძინოს–მეთქი და ვიდრე მეუღლე სკოლიდან მოვიდოდა, მეზობელთან გადავედი. „ფეჩი“ ჩანელებული იყო, ორი ნედლი ნაპობი შევაგდე და წავედი. ცოტა ხანში მეზობლის ბიჭმა დაიძახა: ქეთინო დეიდა შენი სახლიდან კვამლი გამოდის თუ თოვლის ბურიაყიაო? გამოვიქეცით, ფანჯარა რომ გამოვაღე, უკვე ცეცხლი იყო“, – იხსენებს ქეთინო მახათაძე.
მახათაძეების კვამლში გახვეული სახლი მეზობელმა როინ ჩუპკომ დაინახა და საშველად ყვირილი დაიწყო: „ძლიერი ქარი იყო, მეგონა თოვლს იხვევდა, შავი კორიანტელი იდგა. ახლოს რომ მივედი, დავინახე, რომ სახლის ორივე სართული კვმალში იყო გახვეული, მაღლა სართულზე ჯერ ცეცხლი არ ჩანდა, მაგრამ შესვლა ვერ გავბედეთ ძლიერი კვამლის გამო“.
რადგან ამ უბანში ბევრი ისეთი სახლია, სადაც არავინ ცხოვრობს, ცეცხლის ჩასაქრობად ხალხი გვიან შეგროვდა, ვიდრე სახანძრო ჯგუფები თისელში ავიდნენ, სახლი უკვე ცეცხლის ალში იყო გახვეული და მისი გადარჩენა ფაქტობრივად შეუძლებელი იყო.
„ხელებით თოვლს ვაყრიდით, ძალიან ცოტა წყალი მოდის ჩვენთან, ვიდრე ერთ ვედროს ავავსებდით და დავასხამდით, ცეცხლი სხვა ადგილზე ძლიერდებოდა. ვიდრე ჩვენ ხალხის შეგროვება შევძელით, უკვე ცეცხლი გაძლიერდა. ხუთი კაცი მაინც რომ ყოფილიყო ადგილზე, ნივთების 40%–ის გამოტანას მაინც მოვასწრებდით“, – ამბობს მახათაძეების მეზობელი ალექსანდრე ჩუპკო.
თისელში ამბობენ, რომ სახანძრო ჯგუფებმა ასვლა დააგვიანეს.
„ახალციხის სახანძრო მაშველი კი არ არის, აქეთ არის საშველი. 14:14 საათზე მაქვს დარეკილი და 15:30 საათზე მოვიდა. ერთი მანქანა გზაში გაუფუჭდათ, მეორემ საკმარისი წყალი ვერ მოიტანა. ბორჯომის სახანძროს ელოდნენ. სტეკლო რომ ჩაამტვრიეს და ჰაერი დატრიალდა, ყველაფერი ჰაერში წავიდა “, – ამბობს ქეთინო მახათაძე.
სახანძრო–სამაშველო სამსახურში აცხადებენ, რომ შემთხვევის ადგილზე სამი სახანძრო ჯგუფი მუშაობდა, მათ შორის ბორჯომიდანაც. ცეცხლს 15–მდე მეხანძრე–მაშველი აქრობდა. უწყების ინფრომაციით ხანძრის ჩაქრობაც და ლიკვიდაციაც შეძლებისდაგვარად დროულად მოხერხდა: „თუ დეტალური ინფორმაცია გინდათ, შეგვიძლიათ მოგვმართოთ და გამოითხოვოთ ინფორმაცია“.
მომხდარზე ძიება შინაგან საქმეთა სამინისტრომ, 187–ე, ნივთის დაზანება – განადგურების მუხლით დაიწყო. ოჯახს წევრების ვერსიით, ხანძარი ელექტროსადენებისგან გაჩნდა.
„ფანჯარა რომ გამოვაღე, ოთახში ღუმელიც ჩანდა, საწოლიც და დივანიც, კომპიუტერს და ტელევიზორს ეკიდა. ჰაერი რომ მოხვდა, გაძლიერდა ცეცხლი“, – ამბობს ქეთინო მახათაძე, – „29 წელი რაც ვაგროვე და ვინახე, ცეცხლმა წაიღო. ორი ბეჭედი მიპოვეს დამწვარ სახლში მეზობლებმა, ვიცოდი კომოდი სად იდგა და იქიდან ამოჩხრიკეს“.
ამ ეტაპზე მახათაძეები თავს მეზობლის სახლს აფარებენ.რომლებიც ამ ეტაპზე სოფელში არ ცხოვრობენ. მათ პროდუქტებით თანასოფლელები ეხმარებიან. დაზალარებულები დახმარებას ითხოვენ.
[თინათინ ზაზაძე, ახალციხე]